Almaty oblysynda 3 stýdentti tonaǵan qaraqshylar ustaldy
TALDYQORǴAN. QazAqparat –Qaskeleń qalasynda kolledj stýdentterin tonaǵandar ustaldy, dep habarlaıdy QazAqparat tilshisi.
Almaty oblysy PD baspasóz qyzmetiniń málimetinshe, keshe saǵat 22-00 shamasynda Qarasaı aýdanynyń Polıtsııa basqarmasyna jergilikti kolledjderde oqıtyn úsh stýdenttiń ata-anasy habarlasyp, bilim ordasynyń aýmaǵynda belgisiz eki adam 3 stýdentke kúsh qoldanyp, qymbat telefondaryn alyp ketkenin jetkizgen.
«Jedel izdestirý sharalary barysynda polıtseıler qylmysqa qatysy bar eki kúdiktini ustady. Olar 17 jáne 19 jastaǵy Jambyl oblysynyń turǵyndary bolyp shyqty. Syrtqy beınebaqylaý kameralaryna túsken kúdiktilerdi zardap shegýshiler de jazbaı tanydy. Olar jasaǵan qylmystaryn moıyndady jáne sol ýaqyt aralyǵynda telefondardy Almaty qalasyndaǵy bazarlardyń birinde satyp jibergeni anyqtaldy. Atalǵan derek boıynsha QR Qylmystyq kodeksiniń 191-babyna sáıkes sotqa deıingi tergeý amaldary júrgizilýde. Olardyń budan ózge qylmystarǵa qatysy bary tekserilýde»,- dep atap ótti Qarasaı aýdany polıtsııasy bastyǵynyń orynbasary Abaı Tynyshbaev.
