Almaty oblysynda 3 kópbalaly anaǵa úı berildi

TALDYQORǴAN. QazAqparat - Almaty oblysynyń Kerbulaq aýdanynda jalǵyz basty úsh kópbalaly anaǵa baspana berildi. Turǵyn úılerdi aýdannyń isker azamattary tartý etti, dep habarlaıdy QazAqparat tilshisi.

Alǵashqy úıdiń kilti Qyzyljar aýylynyń turǵyny Jumaǵyz Medetovaǵa berildi. Tórt bólmeli úıdi aýdanda áli salynyp bitpegen tsement zaýytynyń basshysy usyndy. Jumaǵyz Medetova úsh qyzymen páterden páterge kóship, týystaryn jaǵalap júrgenine 5 jyldan asypty. Bul sátke ásirese qyzy Jibek qatty qýanǵan. armany oryndalǵanyn jasyrmady. «Ózimizdiń úlken úı bolsa dep armandaıtynmyn. Qazir mine ózimizde úlken úı bar. Qatty qýanyp turmyn. Jazda esik aldyna gúl otyrǵyzamyz. Ózimizdiń bólmelerimiz bolady», deıdi 4-shi synyp oqýshysy. Al Qoǵaly aýylynda turatyn Aıgúl Eshpaevanyń alty balasy bar. Kenjesi áli bir jasqa da tolmaǵan. Kásipker aýyldan birneshe úıdi usynypty. Biraq ol ózine jaılysyn tańdap aldy. Alǵysy sheksiz ana áleýmettik tólemderdiń de óskenine qýanyp otyr. Taǵy bir baspana Taldybulaq aýylynyń turǵyny Nadejda Lemeshkoǵa tarý etildi. 6 balanyń anasy da osy ýaqytqa deıin kóship-qonyp júrip, turaqty mekeni bolmaǵan.

Jalpy Kerbulaq aýdanynda 2100-den astam kóp balaly otbasy tirkelgen. Úı kezeginde turǵan analar sany 100-ge jýyq. Ulystyń uly kúni - Naýryz merekesine deıin taǵy úsh anaǵa baspana berilmek. Odan bólek 20 kópbalaly otbasyǵa azyq-túlik, kıim-keshek jáne otynmen kómek kórsetildi.