Almaty oblysynda 3,3 myńdaı sporttyq nysan jumys isteıdi
ASTANA. QazAqparat - Almaty oblysynda 3 myńnan astam sporttyq nysan jumys isteıdi, dep habarlaıdy oblys ákiminiń baspasóz qyzmeti.
Memleket basshysynyń halyqtyń 30 paıyzyn júıeli túrde dene shynyqtyrýmen jáne sportpen aınalysýǵa tartý týraly tapsyrmasyn iske asyrý maqsatynda Almaty oblysynda aýqymdy jumystar atqarylýda. Oblystyq dene shynyqtyrý jáne sport basqarmasynyń habarlaýynsha, tek bıylǵy jyldyń ózinde jergilikti bıýdjetten atalmysh salany damytýǵa aımaqta 6 mlrd teńgeden astam qarjy bólingen.
Qazirgi kezde oblysta 3 347 sporttyq nysan jumys istese, sonyń 2560-y - aýyldyq jerlerde. Sonyń nátıjesinde ótken jyly buqaralyq sportpen aınalysatyn oblys turǵyndarynyń sany 27 % jetti. Bul oraıda buqaralyq sportpen shuǵyldanatyn balalar men jasóspirimder sany 97 090-ǵa jetip, 30,2 % qurady. Múmkindigi shekteýli azamattardyń sportpen aınalysýyna jaǵdaı jasalyp, osy maqsatta oblys ortalyǵynda mamandandyrylǵan sport mektebi jumys isteýde.
Oblystyq dene shynyqtyrý jáne sport basqarmasynyń málimetine súıensek, qazirgi kezde Talǵar, Raıymbek, Qarasaı aýdandarynda 3 dene shynyqtyrý-saýyqtyrý kesheniniń qurylysy júrip jatyr. Alakól aýdany Úsharal qalasynda memlekettik-jekeshelik seriktestik sheńberinde dene shynyqtyrý-saýyqtyrý kesheniniń qurylysy josparlanyp otyr.
Bıyl Narynqol aýylynda fýtbol alańynyń qurylysy aıaqtalyp, Qaskeleń, Talǵar qalalarynda, Raıymbek aýdany Kegen aýylynda sporttyq keshenderdiń, Qarasaı aýdanynyń Jalpaqsaı aýylynda fýtbol alańynyń qurylystary júrip jatyr. Sonymen qatar Qaratal aýdanynda sporttyq mektepti jańǵyrtý jumystary júrgizilýde.
Atap óterligi, Taldyqorǵanda olımpıadalyq júzý basseıni, jeńil atletıka maneji men velotrek salý josparlanyp otyr.
