Almaty oblysynda 2800 oqýshy eki aptalyq karantınge kóshirildi
Ortalyq kommýnıkaııalar qyzmetinde BAQ ókilderiniń saýalyna jaýap bergen Almaty oblysy ákiminiń orynbasary Batyrjan Baıjumanov osyndaı derek keltirdi.
«Ázirge karantınge eshbir mektepti japqan joqpyz. Qazir aýrý juqtyrǵan balalardy anyqtaý boıynsha jumys júrgizip, synyptardy 2 aptalyq karantındik oqytý rejımine kóshirip jatyrmyz. Búginde 244 synyp 2 aptalyq karantınge jiberildi. Bul – 2 800 bala. Jalpy statıstıkany aıtsaq, bizde 22 400 synyp bar. Búginde sonyń ishinde 244 synyp jabyldy. Búkil synyptardyń 1 paıyzy ǵana degen sóz. Jalpy oblys boıynsha 442 myń oqýshy bar. Sonda synyptardyń bir paıyzy ǵana karantınde», - dedi ákimniń orynbasary.
Sonaı-aq, ol balabaqshada júrip aýrý juqtyrǵandar da bar ekenin aıtty.
«1 qyrkúıekten bastap balabaqsha tárbıelenýshileri arasynda vırýs juqtyrýdyń 18 jaǵdaıy, oqýshylar arasynda 209 jaǵdaı tirkeldi. Qalalar men aýdandardyń bas sanıtar dárigerleri indettiń taralýyn boldyrmaý úshin synyptardy karantınge jiberý týraly 176 qaýly shyǵardy. Pedagogter arasynda aýrý juqtyrýdyń 47 jaǵdaıy tirkeldi», - dedi oblys ákiminiń orynbasary.
