Almaty oblysynda 275 myń adam shaǵyn jáne orta bıznespen aınalysady
NUR-SULTAN. QazAqparat – Almaty oblysynda 275 myń adam shaǵyn jáne orta bıznespen aınalysady. Bul týraly óńir ákimi Amandyq Batalov aıtyp berdi, dep habarlaıdy QazAqparat tilshisi.
«Oblysta shaǵyn jáne orta bıznes sýbektileriniń sany 125 myńǵa jetti, al osy salada 275 myń adam jumys isteıdi. Óndirilgen ónim men kórsetilgen qyzmet kólemi 11% ósip (1,8 trln teńge), ShOB-tyń jalpy ishki ónimdegi úlesi 34%-ǵa jetti. Oǵan Memleket basshysy Qasym-Jomart Toqaevtyń tapsyrmasy boıynsha qolǵa alynǵan salyqtyq jeńildikter, jalǵa alý tólemderinen bosatý túrindegi sharalar oń yqpalyn tıgizdi», - dedi A. Batalov QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda.
Mysaly, jyl basynda Taldyqorǵan qalasynda az qamtylǵan jáne kópbalaly analardy jumysqa tartý maqsatynda tigin tsehy ashyldy. «Jetisý» ÁKK arqyly tsehqa oryn taýyp, kúrdeli jóndeýden ótkizip, lızınginge qural-jabdyqtar satyp alynǵan. Qazir bul shaǵyn fabrıkada 17 áıel jumys istep jatyr, sonyń 12-si «Eńbek» baǵdarlamasymen oqyǵan.
«Mundaı mysaldar bizde az emes, osyndaı usynys-bastamalardy biz árqashan qoldaımyz. Bıyl «Bıznestiń jol kartasy», «Eńbek» baǵdarlamalary men «Jetisý» óńirlik qarjylandyrý baǵdarlamasy aıasynda qarjylandyrý kólemi 21 mlrd teńgege deıin artty. Eki myńǵa jýyq sýbektige memlekettik qoldaý kórsetiledi, 13 myń jumys orny quryldy jáne saqtalady. Oblysta 430 nysan «Ashyq» qosymshasymen jumys isteıdi, bul servısti táýligine orta eseppen 3 myń adam qoldanady. Jalpy osy qabyldanyp jatqan sharalar kásipkerlerdiń burynǵy jumys yrǵaǵyna kóshýine múmkindik beredi dep senemiz», - deıdi A. Batalov.
