Almaty oblysynda 27 myńǵa jýyq balaǵa materıaldyq kómek kórsetildi

TALDYQORǴAN.QazAqparat - Almaty oblysynda «Mektepke jol» aktsııasy aıasynda  27 myńǵa jýyq balaǵa 268,3 mln. teńgeniń materıaldyq kómegi kórsetildi. Onyń ishinde bıýdjettik qarajat esebinen 124 mln. teńgege jýyq, al  demeýshiler men metsenattar tarapynan 144 mln. teńgeden astam somaǵa járdem berildi. Al ótken jyly osy aktsııa sheńberinde oblys boıynsha 51 myńnan astam oqýshy jalpy somasy 427,7 mln. teńgege materıaldyq kómek alǵan bolatyn, dep habarlaıdy QazAqparat oblys ákiminiń baspasóz qyzmetine silteme jasap.

Oblystyq bilim basqarmasynyń málimentinshe, bıylǵy aktsııa «Meniń tańdaýym - balalarǵa kómek kórsetý» úndeýimen ótýde. Sharaǵa atsalysýshylar qatary jyl sanap artyp  keledi. Aktsııa aıasynda arnaıy reıd uıymdastyrylyp, mektepke barmaǵan balalardy anyqtaý, sondaı-aq  halyqtyń áleýmettik qorǵalmaǵan tobynan shyqqan balalardyń jańa oqý jylyna daıyn bolýyna, qajetti kıim-keshekpen jáne qural-jabdyqtarmen qamtylýyna qol ushyn sozý jumystary júrgizilýde. Oblystyq bilim basqarmasy respýblıkalyq aktsııany ótkizý barysynda balalarǵa turaqty járdemdesip kele jatqandar qatarynda óńir  kásipkerleri, metsenattar, «Nur Otan»  partııasy ókilderi, úkimettik emes uıymdar, memlekettik organdar ujymdary jáne qarapaıym turǵyndardyń da bar ekenin aıtyp, olarǵa alǵys bildirýde.

Aıta ketý kerek, «Mektepke jol» qaıyrymdylyq aktsııasy 30 qyrkúıekke deıin jalǵasady.