Almaty oblysynda 26 ret urlyq jasaǵan kúdikti ustaldy
TALDYQORǴAN.QazAqparat - Almaty oblysynda 26 ret urlyq jasaǵan kúdikti ustaldy, dep habarlaıdy QazAqparat tilshisi.
Jedel-izdestirý is-sharalary barysynda Qarabulaq aýylynyń 36 jastaǵy turǵyny kóptegen urlyq faktisine qatysy bar degen kúdikpen ustaldy.
«Ustalǵan adamdy krımınaldyq bazalar boıynsha tekserip, tergeýshiler onyń Almaty oblysy aýmaǵynda 26 urlyqqa qatysy baryn anyqtady. Ol jymysqy áreketterin Qarabulaq, Shymyr, Baqtybaı, Balpyq bı, Taldyqorǵan jáne ózge de eldi mekenderde iske asyrǵan. Qylmysynyń bárin tapatal túste jasap, jeke úılerden plastıkalyq terezelerin ashyp otyrǵan. Dáleldengen epızodtar boıynsha keltirilgen jalpy materıaldyq shyǵyn 15 mıllıon teńgeden asady. Ustalǵan kúdiktiniń osyǵan uqsas ózge de qylmystarǵa qatysy bar-joǵy tekserilýde», - dedi Eskeldi aýdany polıtsııa bóliminiń bastyǵy Qaırat Baımuhanov.
Kúdikti urlyq kezinde negizinen altyn jáne zergerlik buıymdar men uıaly telefondardy alyp ketken.
«Aıǵaq zattary az qylmystardy ashýda qylmyskerlerdiń qol izderi arqyly ǵana anyqtaý sarapshy-krımınalısterdiń asqan sheberligin talap etedi. Mine, osy krımınalıst mamandardyń oqıǵa ornynan muqııat jınaǵan dálelderiniń nátıjesinde onyń birqatar qylmysqa qatystylyǵy áshkerelendi. Kúdikti ýaqytsha ustaý ızolıatoryna qamaqqa alyndy. Ózge aqparat tergeý qupııalyǵyna baılanysty jarııalanbaıdy»,- dedi polıtsııa podpolkovnıgi Qaırat Baımuhanov.
