Almaty oblysynda 250-ge tarta kólik órtengen
TALDYQORǴAN. QazAqparat - Byltyr Almaty oblysynda 246 kólik órtenip, 32 mln teńgeden astam materıaldyq shyǵyn kelgen dep, habarlaıdy QazAqparat tilshisi.
Tipti kólik órtengende ishinde balalardyń da janyp ketken jaǵdaıy bolǵan. Məselen, mundaı qaıǵyly oqıǵa ótken jyly Talǵar aýdanynda oryn aldy. Avtokólik ishindegi órtte eki kishkentaı bala qaza tapty.Esikti ashýǵa múmkindigi bolmaǵan olar mashınamen birge janyp ketken. Jantúrshigerlik jaǵdaıǵa jol bermes úshin mamandar kólikke kishkentaı balalardy qaldyrmaýdy ótinedi.
Jalpy avtokólikterden órttiń shyǵýyna kóp jaǵdaıda elektr symdarynyń aqaýlyǵy nemese apattyq jaǵdaıda jumys isteýi (90% jýyq) sebep eken. Ókinishke oraı órt bolǵan jaǵdaıda júrgizýshiler abdyrap qalyp, túrli qatelikterge jol beredi deıdi mamandar. Birinde órt sóndirý quraly bolmasa, endi biri ony qalaı qoldanýdy bilmeıdi.
"Janǵan kezde janarmaı kóliktiń astyna aǵatyn qasıeti bar, sondyqtan osyndaı jaǵdaılarda kóliktiń astyna sóndirgish zatty, kóbikti nemese qumdy sebińiz. Biraq, bárinen durysy, órtti boldyrmaý nemese paıda bolý táýekelin azaıtý qajet. Ol úshin avtokóligińizdiń tehnıkalyq jaǵdaıyn únemi qadaǵalap turý, eski nemese synǵan elektr symdardy der kezinde aýystyrý qajet", deıdi Almaty oblystyq TJD ÓQSB PQB aǵa ınjeneri, Azamattyq qorǵaý leıtenaty Alııa Sáýirbekova.
Aıta ketý kerek, avtokóliktegi órt qaýipsizdik erejelerin buzǵan adam ákimshilik jaýapkershilikke tartylady.
