Almaty oblysynda 25 jastaǵy jigit janyp jatqan úıden úsh balany qutqardy
TALDYQORǴAN.QazAqparat - Almaty oblysynda 1994 jylǵy Almas Ryızabekov otqa oranǵan úıden úsh balany qutqardy. Qazir jas jigit tilingen aıaq jaraqatyn alyp Eskeldi aýdanynyń ortalyq aýdandyq aýrýhanasynda em qabyldaýda, dep habarlaıdy QazAqparat tilshisi.
Oqıǵa búgin Eskeldi aýdanyndaǵy Qarabulaq aýylynda bolǵan. Janyp jatqan úıden balalardyń aıqaılaǵan daýysyn estigen jigit birden kómekke umtylǵan.
«Órt sóndirý bólimshesi kelgenge deıin jas jigit janyp jatqan úıdiń terezelerin syndyryp, balalardy syrtqa alyp shyqqan. Úıde 2005, 2017 jáne 2012 jylǵy týǵan balalar bolǵan. Oqıǵa ornyna jetken kezde órt sóndirýshiler as úı men turǵyn úıdiń kireberisi otqa oranyp janyp jatqanyn kóredi. Tilsiz jaý jarty saǵat ishinde sóndirildi. Qyzyl jalyn 27 sharshy metr jerdi sharpyǵan. Órt boljam boıynsha elektr symdarynyń qysqa tuıyqtalýynan bolǵan», dep málimdedi Almaty oblystyq TJD baspasóz qyzmetinen.
Dárigerlerdiń málimetinshe, erlik jasaǵan azamattyń ómiri men densaýlyǵyna qaýip joq. Eskeldi aýdany Tótenshe jaǵdaılar bóliminiń qyzmetkerleri tilsiz jaýdan aman qalǵan balalardy týysqandaryna tapsyrdy.
