Almaty oblysynda 25 naýryzdan balyq aýlaýǵa tyıym salynady
TALDYQORǴAN. QazAqparat - Almaty oblysynyń ózen-kólderinde 25 naýryzdan bastap balyq aýlaýǵa tyıym salynady. Shekteýler balyqtardyń ýyldyryq shashý kezeńine baılanysty qoıylyp otyr, dep habarlaıdy QazAqparat tilshisi.
Almaty oblysynyń tabıǵı klımattyq ornalasaýyna baılanysty balyq aýlaýǵa shekteý ár jerde ártúrli bolmaq. Máselen: Sharyn ózeniniń saǵasynan Qytaı Halyq Respýblıkasynyń memlekettik shekarasyna deıingi Іle ózeninde 25 naýryzdan 5 shildeni qosa alǵandaǵy aralyqta balyq aýlaýǵa ruqsat joq. Al Jetisý óńiriniń eń úlken aıdyny Balqash kólinde 15 sáýirden 1 maýsymdy qosa alǵandaǵy aralyqta tyıym salynady. Sondaı-aq Alakól, Sasyqkól, Qoshqarkól kólderinde jáne olardyń quıar saǵalary men shyǵanaqtarynda, Yrǵaıty, Terekti, Tentek, Uıaly, Shynjyly ózenderinde 10 sáýirden 1 maýsymdy qosa alǵandaǵy aralyqta balyq aýlaýǵa bolmaıdy. Almaty oblystyq orman sharýashylyǵy jáne janýarlar dúnıesi aýmaqtyq basqarmasy basshylyǵy bergen málimetke sáıkes shekteýler aqyly balyq aýlaý oryndarynda, jekemenshiktegi toǵandar men sý qoımalaryna júrmeıdi.
Aıta ketý kerek, QR Prezıdenti Q. Toqaevtyń tapsyrmasymen tabıǵat paıdalaný zańnamalarynda quqyqbuzýshylarǵa qarastyrylǵan jaza kúsheıtilgen. Máselen: balyqtyń uryq shashý kezeńinde zańsyz balyq aýlap, tyıym salynǵan bylyq aýlaý quraldaryn qoldanǵany úshin jeke tulǵaǵa 10 AEK, al kishi kásipkerlik sýbektisine 30 AEK, orta kásipkerlik sýbektilerine 50 jáne iri sýbektilerge 100 AEK qarastyrylǵan. Almaty oblystyq orman sharýashylyǵy jáne janýarlar dúnıesi aýmaqtyq basqarmasy basshysynyń orynbasary Aıan Baıanhanovtyń aıtýynsha, zań buzý faktisi bir jyl ishinde qaıtalansa, aıyppul kólemi eki eselenedi.
Jalpy aýmaqtyq ınspektsııa kúshimen 2019 jyly balyq sharýashylyǵyna qatysty 344 zańbuzý deregi anyqtaldy. 331 jeke jáne zańdy tulǵa ákimshilik, 9 adam qylmystyq jazaǵa tartyldy. Olarǵa 5,2 mln teńge aıyppul salynyp, 4,9 mln teńgesi óndirildi.
