Almaty oblysynda 230,2 mln teńge jalaqy bereshegi qaıtaryldy

TALDYQORǴAN. QazAqparat - Almaty oblystyq memlekettik eńbek ınspektorlary 2016 jyldyń 8 aıynda mekemelerde jumysshylardyń aryz-shaǵymdary men prokýratýranyń talap-hattary boıynsha jospardan tys 318 tekserý júrgizgen. Nátıjesinde 810 zań buzýshylyq anyqtaldy, onyń ishinde eńbek qatynastary boıynsha 446, eńbek qaýipsizdigi boıynsha - 271, jumyspen qamtý baǵytynda 93 zań buzýshylyq tirkelgen.

Málimetterge qaraǵanda, esepti kezeńde eńbek ınspektorlary ákimshilik jaýapkershilikke 338 laýazymdy tulǵany tartyp, zańdy tulǵalarǵa 13 mln 659 myń teńge mólsherinde aıyppul salǵan.

Jyl basynan memlekettik eńbek ınspektorlary 54 mekeme men kásiporyndardyń 985 qyzmetker aldynda 230,2 mln teńge jalaqy qaryzdary baryn anyqtady. Atalǵan mekemelerdiń basshylaryna eńbek zańnamasy talaptarynyń buzylýyn joıý maqsatynda 50 uıǵarym berilip, 6,7 mln teńge mólsherinde aıyppul salyndy. Nátıjesinde 230,2 mln teńge jalaqy qaryzdary jabylyp, 985 adamnyń quqyǵy qorǵaldy.

Sonymen qatar, ótken 8 aıda oblys kásiporyndarynda óndiriske baılanysty 19 jazataıym oqıǵa oryn alǵan. Mamandardyń aıtýynsha, oqys oqıǵalardyń basym bóligi jumys berýshiler men jumys óndirisin uıymdastyrýshylar tarapynan jáne zardap shegýshilerdiń ózderiniń eńbek qaýipsizdigi jaǵdaılaryna nemquraıdy, jaýapsyz qaraýy jáne elemeýshilik saldarynan bolady.

«Tutastaı alǵanda Almaty oblysynda eńbek qatynastarynyń jaǵdaıy turaqty. Jumys berýshi, kásipodaq jáne qyzmetkerler arasyndaǵy qarym-qatynas rettelgen. Nátıjesinde oblys boıynsha eńbek daýlary oryn alǵan joq», - dedi Jumaǵalı Álibaev.