Almaty oblysynda 21 kún buryn joǵalǵan mektep oqýshysy tabyldy
TALDYQORǴAN. QazAqparat - Almaty oblysynda iz-túzsiz joǵalǵan Mılana Izýkaeva tabyldy. 17 jastaǵy jasóspirim 21 kún boıy qurbysynyń úıinde jasyrynyp jatqan, dep habarlaıdy QazAqparat tilshisi.
Almaty oblystyq ІІD baspasóz qyzmetiniń málimetinshe, joǵalǵan qyzdy polıtseıler Almaty qalasynan tapqan.
«Mektep oqýshysyn izdeýge Talǵar aýdanynyń jáne oblystyń polıtseıleri jumyldyryldy. Keshe keshkisin Mılana Izýkaeva Almaty qalasynan tabyldy. Ol din aman. Osy ýaqytqa deıin qurbysynyń úıinde jasyrynyp jatqan. Jasóspirim ata-anasynyń qolyna tabystaldy», - dep málim etti Almaty oblystyq ІІD baspasóz qyzmeti.
Anyqtalǵandaı, 17 jastaǵy qyzdyń úıinen qashyp ketkeni alǵashqy jaǵdaı emes eken. Sol sebepti, polıtseıler jasóspirimmen kezekti profılaktıkalyq is-shara júrgizdi.
Esterińizge sala keteıik, biz buǵan deıin mektep oqýshysynyń joǵalǵandyǵy jóninde habarlaǵan bolatynbyz. Talǵar aýdanyndaǵy Qaınar aýylynyń turǵyny 25 sáýirde úıinen shyǵyp ketip, oralmaǵan. Jasóspirimniń ata-anasy polıtseılerdiń kómegine júginip, joǵalǵan oqýshynyń sýreti BAQ quraldaryna jáne áleýmettik jelide jarııalanǵan bolatyn.
