Almaty oblysynda 200 myńnan astam adam jol erejesin buzdy
TALDYQORǴAN. QazAqparat - 2016 jyly Almaty oblysynda jol júrý erejelerin buzǵan 211 732 adamǵa ákimshilik hattamalar toltyryldy.
Onyń ishinde mas kúıinde kólik júrgizgender sany - 2 586. Mas kúıinde jasalatyn qylmystardyń aldyn alý maqsatynda esep berý kezeńinde 233 tulǵa májbúrlep emdeý úshin arnaıy mekemelerge joldandy, dep habarlaıdy QazAqparat tilshisi.
Bul jóninde Almaty oblystyq Óńirlik kommýnıkatsııalar qyzmetinde ótken shara barysynda Jergilikti polıtsııa qyzmetiniń ókilderi málim etti.
«Ótken jyly qoǵamdyq oryndarda jasalǵan qalmystar sany 1,3 paıyzǵa, onyń ishinde kóshe qylmystary 5,3 paıyzǵa tómendedi. Sondaı-aq, kóshelerde oryn alǵan aýyr qylmystar 12,7 paıyzǵa, asa aýyr qylmystar 42,1 paıyzǵa azaıdy»,- dep atap ótti oblystyq Jergilikti polıtsııa qyzmeti bastyǵynyń orynbasary Shyńǵys Sabýrov.
Sondaı aq ótken jyly otbasylyq-turmystyq ortada jasalǵan qylmystar sany 4,5 paıyzǵa tómendegen.
Aıta ketý kerek, 2016 jyly 1 qańtarda Elbasymyzdyń tapsyrmasy negizinde Jergilikti polıtsııa qyzmeti qurylyp, qyzmet atqarýdyń jańa nysanyna kóshken bolatyn. Jergilikti polıtsııa qyzmetiniń qurylýy barysynda uıymdastyrýshylyq máselelerdi sheshýge oblys ákimdiginiń kómegi zor boldy.
Atap aıtqanda, 2016 jyly oblys ákiminiń qoldaýymen jergilikti bıýdjetten 389 mln teńge bólinip, olarǵa 60 - qyzmettik avtokólik, 15 - «Krıs-P» jyljymaly fotoradarlary jáne beıne materıaldardy jınaqtaıtyn 4 stansy satyp alyndy.
«2017 jyly 62 ýchaskelik polıtsııa pýnktterin turǵyzý jáne ýchaskelik polıtsııa ınspektorlary, jol-patrýldik polıtsııa, ıývenaldyq polıtsııa qyzmetkerleri úshin 107 jańa avtokólikter alý josparlanyp otyr»,- dep habarlady Sh.Sabýrov.
