Almaty oblysynda 200 ardagerge qurmet kórsetildi
Qurmetti qonaqtardy Taldyqorǵan áskerı garnızony orkestriniń áskerı marshymen qarsy alyp, olarǵa gúl shoqtary men estelik syılyqtar tabys etildi. Foıede ardagerlerge arnalǵan fotostýdııa uıymdastyryldy. Kezdesý soǵysqa arnalǵan derekti fılm kórsetýden bastaldy.
Ardagerlerdi quttyqtaǵan oblys ákimi A. Batalov maıdangerler men tyl eńbekkerleriniń búgingi beıbit ómirge jetý jolyndaǵy úlesin atap ótti.
«Barshańyzdy alda kele jatqan Uly Jeńis kúnimen shyn júrekten quttyqtaımyn! Sizderdiń densaýlyqtaryńyz ben turmystaryńyzǵa qamqorlyq kórsetý - Prezıdent Nursultan Nazarbaevtyń aldymyzǵa qoıǵan mańyzdy mindetteriniń biri. Densaýlyqtaryńyz kútimde, ǵumyrlaryńyz ıgilikti bolýy úshin, aman-esen ortamyzda júrip, eldiń ósip-órkendegenine kýá bolýlaryńyz úshin biz barlyq jaǵdaıdy jasaýǵa tyrysamyz», - dedi A. Batalov.
Óz kezeginde ardagerler - Eńbekshiqazaq aýdanynan Soltanbaı Jaryqbasov, Sarqan aýdanynan Berlibek Ysqaqov, tyl eńbekkeri, Balqash aýdanynan Beısenbek Tóstikbaev sóz alyp, qatarlastaryna izgi tilekterin jetkizse, soǵys ardageri Sársenbaı Qańtarbaı aqsaqal kópshilikke bata berdi. Merekelik shara kontserttik baǵdarlamaǵa ulasty.
Jalpy búginde Jetisý jerinde 138 soǵys ardageri, 12 myńǵa jýyq tyl eńbekkeri bar. 9 mamyr - Jeńis kúnine oraı oblystyq bıýdjetten árbir soǵys ardagerine 150 myń teńge kóleminde birjolǵy materıaldyq kómek berildi. Ardagerlerge jáne basqa da sanattaǵy azamattarǵa shıpajaılarǵa tegin emdelýge bıylǵy jyly 187,5 mln teńge qarjy bólindi. UOS qatysýshylary men múgedekterin qosalqy jáne kómekshi quraldarmen qamtý úshin bıýdjetten 2 mlrd 830 mln teńge, al kommýnaldyq qyzmetterge 16 mln teńge qarjy qarastyrylǵan.
