Almaty oblysynda 20 jyl toqtap turǵan sút zaýyty qaıta iske qosyldy
TALDYQORǴAN.QazAqparat - Almaty oblysynyń Kóksý aýdanyna qarasty Labasy aýyldyq okrýginde sút zaýyty qaıta iske qosyldy. 20 jyl boıy toqtap turǵan mekeme aqyryndap tolyq qýatyna kóshýdi josparlap otyr, dep habarlaıdy QazAqparat tilshisi.
Sút zaýyt 1967 jyly boı kótergen. Kásiporyn toqyraý jyldary jumysyn toqtatqan bolatyn. Qaıta jandanǵan mekeme qazir túrik aıranyn, qurǵaq sút jáne irimshik shujyǵyn shyǵarýda.
«Zaýyt tolyq qýatyna kóshkennen keıin sút ónimderiniń barlyq túrin shyǵarý josparlanyp otyr. Zaýyttyń qysta iske qosylýynyń ózinde úlken mán jatyr. Sebebi, kóktem shyǵyp, jaz kelgenge deıin óndiris ábden bir jolǵa qoıylady. Ári jas mamandar da tájirıbe jınaqtap, aýqymdy kólemde jumys isteýge shyńdalady. Degenmen de, zaýytqa ınjener-tehnologtar, zerthanashylar áli de jetispeýde», - dedi zaýyt basshysy Baqyt Arqabaev.
Qazir bul jerde 20 adam eńbek etedi. Aldaǵy ýaqytta jumysshylar qatary ulǵaıa bermek. Zaýytqa jaqyn mańdaǵy Kerbulaq, Eskeldi, Qaratal aýdandarynyń turǵyndary sút ónimderin ótkizýde. Táýligine 40 tonna sút qabyldap alýǵa qaýqary bar óndiris oshaǵyna memleket tarapynan kásipkerlikti damytý qory arqyly 100 mln teńge qarjylaı qoldaý kórsetilgen. Qazir qaıta jańǵyrǵan kásiporyn kúnine 17-18 myń staqan túrik aıranyn shyǵaryp, táýligine 60 keliden asa irimshik shujyǵyn óndirýde.
