Almaty oblysynda 2,2 mln tonna qysqy mal azyǵy daıyndaldy
QONAEV. QazAqparat – Almaty oblysynda 2, 2 mln tonnadan astam qysqy mal azyǵy daıyndaldy. Bul qajetti mal azyǵynyń 79,1 paıyzy, dep habarlaıdy QazAqparat.
Almaty oblysy ákimdiginiń málimetine súıensek, kúzgi jıyn-terin naýqanynda mal azyǵyn daıyndaý jumysy qarqyndy júrip jatyr. Jyl saıyn mal basynyń sany 3-4%-ǵa ósýin eskere otyryp, Almaty oblysynda 2023-2024 jyldarǵa 2 791,4 myń tonna jem-shóp qoryn daıyndaý josparlandy.
«2023 jyly oblysta 665,2 myń bas iri qara, 2 354,6 myń bas qoı-eshki, 218 myń bas jylqy, 7,1 myń bas túıe qystaýǵa shyǵady dep josparlanǵan. Búginde 2 207,1 myń tonna mal azyǵy daıyndaldy (79,1%), onyń ishinde 1506,5 myń tonnasy shóp (87,8%), 183,8 myń tonnasy pishendeme (86%), saban 163,8 myń tonna (66,5%), súrlem 175,4 myń tonna (56,3%), 177,6 myń tonnasy jem (58,7%)», - dep atap ótti óńir ákimdiginiń baspasóz qyzmeti.
Úıir-úıir jylqysy, tabyn-tabyn sıyry bar sharýalar Balqash aýdanynda shóptiń baǵasy tym qymbattap ketkenin tilge tıek etti.
Aıtýlarynsha, jem-shóp ózge aýdandarǵa satylyp jatyr. Jergilikti halyqqa jońyshqanyń 1 býmasy 4-5 myń teńgege berilse eken degen tilekteri bar.
Al jergilikti bılik qarapaıym halyqqa sharýalarmen kelisip shópti 4 myń teńgeden alyp berip jatqanyn atap ótti.
