Almaty oblysynda 19 jastaǵy boıjetken ózin zorlady dep tanysyna jala japqan
TALDYQORǴAN. QazAqparat - Taldyqorǵan qalalyq sotynyń úkimimen 19 jastaǵy qyz kináli dep tanylyp, 3,5 jylǵa bas bostandyǵy shekteldi, dep habarlaıdy QazAqparat tilshisi.
2020 jyldyń mamyr aıynda Taldyqorǵan qalasy PB Batys qalalyq polıtsııa bóliminde QR Qylmystyq kodeksiniń 120-babyna sáıkes «Zorlaý» deregi boıynsha qylmystyq is qozǵaldy.
Tergeý barysynda tergeýshi ótinish berýshiniń jaýabyndaǵy birqatar sáıkessizdikterdi anyqtady. Olar anyqtalǵan keıbir jaıttarǵa qarama-qaıshy keldi.
Saraptama qorytyndysymen jáne basqa da obektıvti dáleldermen teriske shyǵaryldy.
Ózge bireýdiń ústinen polıtsııaǵa aryzdanǵan Kóksý aýdany Muqyr aýylynyń 19 jastaǵy turǵynynyń tanysyna jala japqany áshkere boldy.
Tártip saqshylary zorlaý deregi boıynsha qylmystyq isti qysqartyp, kórineý jalǵan sóz jetkizý deregi boıynsha QR Qylmystyq kodeksiniń 419-babyna sáıkes qylmystyq is qozǵady.
Sotqa deıingi tergeý materıaldary negizinde osy jyldyń qazan aıynda Taldyqorǵan qalalyq sotynyń úkimimen 19 jastaǵy qyz kináli dep tanylyp, oǵan 3,5 jylǵa bas bostandyǵyn shekteý jazasy taǵaıyndaldy.
