Almaty oblysynda 180 oryndyq sport kesheni ashyldy
TALDYQORǴAN.QazAqparat - Búgin Almaty oblysynyń Talǵar qalasynda sporttyń jekpe-jek túrlerine arnalǵan 180 oryndyq dene shynyqtyrý-saýyqtyrý ámbebap kesheni men Talǵar aýdandyq «Almaly» balalar men jasóspirimder sport mektebi ashyldy. Osy aıtýly qýanyshpen turǵyndardy oblys ákimi Amandyq Batalov quttyqtady, - dep habarlaıdy QazAqparat tilshisi.
Amandyq Ǵabbasuly óz sózinde Elbasy bıylǵy halyqqa arnaǵan Joldaýynda 100 sport keshenin ashýdy, sonymen qatar buqaralyq sportty damytýdy tapsyrǵanyna toqtalyp ótti.
«Osyǵan oraı Jetisý jerinde jańa sporttyq keshen ashyp otyrmyz. Keler jyldy Elbasy "Jastar jyly" jyly dep jarııalady. Olaı bolsa jastarymyz shyńdalyp, salaýatty urpaǵymyz kóp bolýyna, jańa chempıondar tərbıelep shyǵarýǵa osy keshenniń qosar úlesi zor bolady dep oılaımyn», - dedi A. Batalov.
Munan keıin Məskeý Olımpıadasynyń chempıony Jaqsylyq Úshkempirov pen Sıdneı Olımpıadasynyń chempıony Ermahan Ibraımov sóz alyp, jastarǵa aq batasyn arnady. Saltanatty sharadan keıin "Almaly" balalar men jasóspirimder sport mektebiniń dırektory Dəýren Úshkempirovke jańa keshenniń kilti tabystaldy.
Nysannyń lentasy qıylyp, qonaqtar keshenniń ishin aralap kórdi. Munda trenajerlyq, oıyn, kúres, boks jáne jattyǵý zaldary bar. Keshen aýmaǵynda voleıbol, basketbol, fýtbol sporttyq alańdary men 400 oryndyq kórermen trıbýnasy ornalasqan.
DSO ǵımaratynda «Almaly» balalar men jasóspirimder sport mektebi jumys isteıdi. Mektepte balalarǵa sporttyń 15 túrinen, atap aıtqanda, boks, basketbol, voleıbol, grek-rım jáne erkin kúrester, qazaqsha kúres, jeńil atletıka, fýtbol, gandbol, taekvondo, karate-do, sambo, jekpe-jek, sadaq atý, taı-bokstan jattyǵýǵa jaǵdaı jasalǵan. Qazirgi kezde munda 915 oqýshy sportpen aınalysyp júr.
Kelýshiler DSO-nyń ishki jabdyqtalýy men materıaldyq-tehnıkalyq bazasynyń nyǵaıtylýyna kýá boldy. Sport zaldaryn aralap, jas sportshylarmen áńgimelesti.
Atap ótsek, ámbebap DSO qurylysyna 759,6 mln. teńge bólingen.
