Almaty oblysynda 180-ge jýyq adam sýdan qutqaryldy
TALDYQORǴAN. QazAqparat - Almaty oblystyq TJD qyzmetkerleri shomylý maýsymy bastalǵaly 179 adamdy sýdan qutqardy. Bir ǵana Alakól kólinen qutqarýshylar 36 adamnyń ómirin saqtap qaldy, dep habarlaıdy QazAqparat tilshisi.
Dál qazir Almaty oblysynda shomylý maýsymy qyzǵan shaq. Sondyqtan qutqarýshylar jumysynyń da qarbalas kezi.
Almaty oblystyq TJD sýda qutqarý qyzmeti saqtyq sharalaryn kúsheıtip, jumysty qarqyndy atqarýǵa kiristi. Alakól jaǵalaýynda jergilikti polıtsııa qyzmeti jáne qutqarý jasaǵy birlesip reıdtik sharalar uıymdastyrdy.
Jumys barysynda Alakól aýdandyq tótenshe jaǵdaılar bóliminiń qyzmetkeri Qýanysh Ybraıymbaev batyp bara jatqan azamatshany qutqaryp qaldy. Alakóldegi demalys aımaqtarynyń birinde demalyp jatqan Raıa Nurasylova sýda aıaǵy tartylyp, bata bastaıdy. Qasyndaǵy týystary dabyl qaǵyp kómek suraıdy. Osy sátti baıqap qalǵan qutqarýshy azamatshany jaǵaǵa shyǵaryp, shuǵyl túrde qoldan dem aldyrý ádisin qoldanyp, ony ólimnen arashalap alyp qalady.
Raıa Nurasylova ózin qutqarǵan azamatqa alǵysyn bildirip, jaqsy tilekterin jetkizdi.
Jalpy Almaty oblysynda jyl basynan beri 31 adam sýǵa ketip mert boldy. Olardyń qatarynda kámelet jasyna tolmaǵan 8 bala bar, deıdi Almaty oblystyq TJD sýda qutqarý qyzmetiniń basshysy Saılaýbek Sharapıev.
Jetisýdyń bas qutqarýshysy aldaǵy ýaqytta da demalýshylardyń ózine jáne balalaryna saq bolyp, tyıym salǵan jerlerde shomylmaýyn eskertti.
Aıta ketý kerek, Alakólde sońy qaıǵymen aıaqtalǵan tótenshe jaǵdaı tirkelgen joq. Qaza bolǵandardyń basym bóligi shomylýǵa ruqsat etilmegen jerde shomylǵan.
