Almaty oblysynda 17 tamyzdan keıin ashylatyn jáne jabyq bolatyn nysandar

TALDYQORǴAN. QazAqparat – 17 tamyzdan bastap Almaty oblysynda karantın talaptary jeńildetilip, birqatar nysannyń jumys isteýine ruqsat beriledi, dep habarlaıdy QazAqparat tilshisi.

«Qoǵam men bıznes ókilderiniń tilekterin eskere otyryp, karantındik sharalardy birtindep jeńildetemiz. Saýda úılerinde jumys isteýge ruqsat beremiz, jazǵy alańdardy ashamyz. Biraq, oblys turǵyndary men bıznes ókilderi qaýipsizdiktiń negizgi erejelerin buzbaýy kerek. ıAǵnı, jappaı jınalatyn oryndarǵa barmaı, qashyqtyq pen betperde rejımin saqtaýy kerek», - dedi Almaty oblysynyń bas sanıtarlyq dárigeri Erǵalı Sydymanov.

17 tamyzdan bastap jumysyn qaıta bastaıtyn nysandar:

- saýda úıleri, saýda jelileri, jabyq bazarlar tańǵy saǵat 10.00-den keshki 21.00-ge deıin, býtıkter saǵat 11.00-den 17.00-ge deıin jumys isteıtin bolady. Demalys kúnderi barlyq nysandardyń jumysy toqtatylady;

- dárihanalar men azyq-túlik dúkenderiniń jumysy 21.00-ge deıin uzartylady;

- azyq-túlik satatyn jáne azyq-túlik satpaıtyn jabyq bazarlar 30%-ǵa tolyqtyrýmen jumys isteıdi. Kúndelikti saǵat 10.00-den 16:00-ge deıin, kóterme bazarlar tańǵy 06.00-den 12.00-ge deıin jumys jasaıdy. Demalys kúnderi jabyq bolady;

- jazǵy ashyq alańdar otyrǵyzý oryndarynyń shektelýimen jumys isteıdi (30 adam);

- 15 adamǵa arnalǵan balabaqshalarda kezekshi toptar ashylady;

- qoǵamdyq kólik tańǵy 06.00-den 22.00-ge deıin jáne keshki 17.00-den 21.00-ge deıin, 5 mınýt aralyqpen, 50% tolyqtyrýmen qatynaıdy;

- monshalar, saýnalar, fıtnes-ortalyqtar, balalar túzetý kabınetteri, bilim berý ortalyqtary 50% tolymdyqpen qaıta ashylady.

- sulýlyq salondary, shashtarazdar, SPA-kosmetologııalyq ortalyqtary, aldyn ala jazylý boıynsha qyzmet kórsetedi.

Sondaı-aq 17 tamyzdan keıin birqatar tyıymdar saqtalady:

- oıyn-saýyq, sporttyq, otbasylyq, estelik, saltanattary jáne basqa da úlken is-sharalardy ótkizýge tyıym salynady.

- bar, túngi jáne oıyn-saýyq klýbtarynyń, karaoke, fýdkorttardyń, kınoteatrlardyń jáne balalar men eresekterge arnalǵan basqa da oıyn-saýyq oryndarynyń jumysyna ruqsat berilmeıdi.

- mádenıet nysandarynyń, murajaılardyń qyzmeti, konferentsııalar, kórmeler, forýmdar ótkizýge bolmaıdy.

- basseınder, qalalyq jáne qoǵamdyq jaǵajaılar, ashyq akvaparkter ashylmaıdy.

- dinı nysandardyń, qalamańy jáne qalaaralyq avtobýstardyń jumysyna tyıym salynǵan (shaǵyn avtobýstardy qospaǵanda).