Almaty oblysynda 17 myń jeke sharýa kooperatıvterge birikti
TALDYQORǴAN. QazAqparat - Almaty oblysynda 17 myń jeke sharýa kooperatıvterge biriktirilgen. Ótken jyly 150 aýylsharýashylyq kooperatıvi 3704 tonna et, 20 myń tonnaǵa jýyq sút jáne 7 myń tonnadan astam jemis-jıdek jáne kókónis óndirdi. Bul týraly búgin óńir ákimi Amandyq Batalovtyń halyqpen esep berý kezdesýinde málim boldy, dep habarlaıdy «QazAqparat» HAA tilshisi.
Atap ótilgendeı, ótken jyly aýyl sharýashylyǵyndaǵy jalpy ónim kólemi 647,6 mlrd teńgeni qurap, naqty kólem ındeksi 103,3% jetti. Oblystyń agroónerkásip keshenine 67 mlrd teńge ınvestıtsııa tartylǵan. Jalpy somasy 22,9 mlrd teńge bolatyn 77 ınvestıtsııalyq joba iske qosylyp, 1397 jumys orny quryldy.
«Óńir úshin strategııalyq mańyzy bar daqyldar: maıburshaq kólemi - 9,3 myń gektarǵa, dándi júgeri - 2,7 myń, qant qyzylshasy 2,3 myń gektarǵa ulǵaıdy. Al aýylsharýashylyq daqyldardyń jalpy kólemi 947,8 myń gektarǵa jetti. Egin sharýashylyǵy óniminiń óndirisi 2,2% ulǵaıyp, 1,3 mln tonna astyq, 334 myń tonna qant qyzylshasy, 293 myń tonna maıly daqyldar, 1,8 myń tonna kartop, jemis jáne kókónis óndirildi», - dedi Amandyq Batalov.
Sondaı-aq aımaq basshysynyń aıtýynsha, oblysta 1637 gektar baq otyrǵyzylǵan.
Aıta ketý kerek, Almaty oblysy aýylsharýashylyq kórsetkishteri jaǵynan respýblıkada birinshi orynda tur.
