Almaty oblysynda 16 jastaǵy oqýshy qyzdy urǵan eki áıeldiń bireýi ustaldy
TALDYQORǴAN. QazAqparat - Almaty oblysynda 16 jastaǵy oqýshy qyzdy aıaýsyz urdy degen kúdikpen 27 jastaǵy áıel ustaldy. Onyń janyndaǵy ekinshi áıel áli qashyp júr, - dep habarlaıdy QazAqparat tilshisi.
Taksıge minip qashyp ketken eki áıeldiń biri 6 kúnnen keıin qolǵa tústi. Ekinshisi áli izdestirilýde.
Almaty oblystyq polıtsııa departamenti baspasóz qyzmetiniń málimetinshe, oqýshyny urǵan eki áıeldi ustaý úshin keshendi jumystar júrgizilgen.
Nátıjesinde, 19 mamyr kúni 27 jastaǵy Almaty qalasynyń jergilikti turǵyny ustaldy. Ol arnaıy dálelderden keıin kinásin moıyndady. Oqýshyny urǵan ekinshi kúdikti áıel adamnyń kim ekeni anyqtaldy. Ol 30 jastaǵy Eńbekshiqazaq aýdanynyń Báıterek aýylynyń turǵyny. Biraq ol áli qolǵa túspedi. Ony ustaý úshin polıtseıler jumys istep jatyr.
Esterińizge sala keteıik, 13 mamyr kúni Almaty oblysynda oqýshy qyzdy eki belgisiz áıel uryp ketti.
Oqıǵa Іle aýdanynyń Boraldaı aýylynda bolǵan.
