Almaty oblysynda 1500 oryndyq 7 mektep salynady
NUR-SULTAN. QazAqparat – Almaty oblysynda úsh aýysymdy mektepter problemasy 2025 jylǵa deıin joıylady. Sol úshin 1500 oryndyq 7 mektep salý josparlanyp otyr, dep habarlaıdy QazAqparat tilshisi.
Úkimet otyrysynda óńirde Jumyspen qamtýdyń jol kartasy qalaı iske asyp jatqanyn baıandaǵan oblys ákimi Amandyq Batalov osyndaı málimet usyndy.
«2025 jylǵa ınfraqurylymdyq jobalar turaqty jumys oryndaryn qura otyryp úsh aýysymmen oqytatyn mektepterdi joıýǵa baǵyttalady. Búginde 1500 oryndyq 7 mekteptiń smetalyq qujattary daıyndaldy, jer telimi bólindi. Konkýrs aıaqtalyp, qurylys júrgizý úshin kelisimsharttar jasaldy. Qurmetti Asqar Uzaqbaıuly, qurylys jumystaryn bastaý úshin qarajat bólýdi jedeldetýdi suraımyn», - dedi oblys ákimi.
Aımaq basshysynyń bergen deregi boıynsha, 2025 jylǵa deıin Almaty oblysyndaǵy Jumyspen qamtýdyń jol kartasy aıasynda iske asatyn jobalaryn qarjylandyrý lımıti 31,8 mlrd teńge bolyp bekitilgen eken. Onyń ishinde 8 ınfraqurylymdyq jobany iske asyrýǵa 13,1 mlrd teńge, shaǵyn nesıelendirýge 2 mlrd teńge, agroónerkásip kesheniniń jobalaryn nesıelendirýge 14,3 mlrd teńge jáne bıznesti qoldaýǵa 2,4 mlrd teńge qarastyrylǵan.
«Oblystyń agroónerkásip keshininde bıyl 29 mlrd teńgege 24 nysandy iske qosýdy josparlap otyrmyz. «Báıterek» holdınginiń jeńildetilgen nesıeleri jobalardy júzege asyrýǵa jaqsy qoldaý bolady. Mysaly, búgin 18,8 mlrd teńgege 9 joba qaralýda», - dedi Amandyq Batalov.
