Almaty oblysynda 1500 adamǵa jumys beretin logıstıkalyq hab ashylady

TALDYQORǴAN. QazAqparat - Almaty oblysynda A+ klasty avtomattandyrylǵan, alańy 200 myń sharshy metr bolatyn Qazaqstandaǵy iri logıstıkalyq hab salynady. Sonyń nátıjesinde oblysqa 200 mln. AQSh dollary kóleminde ınvestıtsııa tartylyp, 1,5 myń jumys orny ashylady, dep habarlaıdy QazAqparat Almaty oblysy ákimdiginiń baspasóz qyzmetine silteme jasap.

Búgin Almaty oblysynyń ákimi Qanat Bozymbaev pen «AIRBA FF» JShS Dırektorlar keńesiniń tóraǵasy, «Tehnodom» kompanııasynyń negizin salýshy Edýard Kım osyndaı memorandýmǵa qol qoıdy,

Kezdesýde Qanat Bozymbaev osy iri ınvestıtsııalyq jobany iske asyrý óńirdiń logıstıkalyq áleýetin damytyp qana qoımaı, tutastaı alǵanda oblys ekonomıkasyna mýltıplıkatıvti nátıje beretinine atap ótti.

«Bul - buryn Almaty oblysynda bolmaǵan óte tartymdy ári mańyzdy joba. Zamanaýı tsıfrlyq tehnologııalardy qoldaný ereksheligin eskersek, naǵyz jańa dáýirge laıyq deýge bolady. Birinshiden, bizdiń agrarlyq saladaǵy sharýashylyqtarymyzdyń óz ónimin ótkizýine jaǵdaı jasaıdy. Elimizdiń agroónerkásiptik keshenindegi ónim kóleminiń 28-30%-in Almaty oblysy óndiretinin eskersek, bul - biz úshin úlken múmkindik. Ekinshiden, shaǵyn jáne orta bıznesti qarjylaı qoldaýǵa jańa múmkindikter ashady. Sonymen qatar ınvestor kompanııa Taldyqorǵan qalasyndaǵy kolledjderdiń biriniń bazasynda ІT mamandar daıyndaıtyn oqý ortalyǵyn ashady. Bul tsıfrlyq mashyqtaryn jetildirip, dýaldi oqytýdy damytýǵa yqpal etedi. Árıne, óńir ekonomıkasy úshin salyq túsimderi de mańyzdy. Degenmen biz úshin halyqtyń múddesi aldyńǵy orynda. Keshen 1500 adamǵa jumys beredi. Nysan ornalasatyn Іle aýdanynda 300 myńnan astam adam turady, al oblystaǵy halyq sany 2 mln. 200-ge jetti. Logıstıkalyq keshen jańa jumys oryndarynyń ashylýyna, zamanaýı tehnologııalar men qarjylaı qoldaý quraldary aıasynyń keńeıýine jaǵdaı jasaıdy. Jobaǵa barlyq kezeńinde barynsha qoldaý kórsetetin bolamyz», - dedi Q.Bozymbaev.

Óz sózinde Erýard Kım bastamalaryna qoldaý kórsetkeni úshin oblys basshylyǵyna rızashalyǵyn bildirip, jobanyń erekshelikterine toqtaldy.

«Bizdiń kompanııamyzǵa senim bildirgenińizge alǵys aıtamyn. Búginde qoǵamnyń basty mindeti ómir súrý sapasyn arttyrý, ásirese, jastardyń ómir súrý deńgeıin kóterý - basty maqsat. Bizdiń kompanııa qyzmetkerleriniń ortasha jasy – 28 jas. Biz jastardyń oqýyna, arnaıy mamandyq alýyna, qyzmettik baspaldaqtarǵa kóterilýine, laıyqty jalaqy alýlaryna jaǵdaı jasap kelemiz. Logıstıkalyq hab qurýdyń da negizgi maqsaty osy. Biz oblystyń ınfraqurylymyn damytýǵa nazar aýdaryp, ekonomıkanyń túrli salalaryn tsıfrlandyrýǵa kómektesemiz», - dedi E.Kım.

Qol jetkizilgen kelisimge sáıkes mańyzdy ınvestıtsııalyq joba aldaǵy 5 jylda birneshe kezeńmen iske asyrylady. Keshen Іle aýdanynda ornalaspaq.

Óziniń negizgi fýnktsııasymen qatar nysan klıentter tartý men ónimderdi ornalastyrýǵa arnalǵan «Airba Marketplace» onlaın-sóresin paıdalanýǵa jaǵdaı týǵyzady. Sol sııaqty «Airba Fintech» onlaın-platformasynyń múmkindikterin paıdalana otyryp, aýyl sharýashylyǵy taýar óndirýshileri jeńildikpen qarjylandyrý men aınalym qarjysyn tolyqtyrýǵa qol jetkize alady, óz taýarlaryn deldaldardyń qatysýynsyz iri saýda jelilerinde satý jónindegi kelisimsharttar jasasa alady, al jas mamandar turǵyn úı satyp alýǵa nemese baspana jaǵdaıyn jaqsartýǵa qoljetimdi ıpoteka ala alady. Bul qyzmetterge júginý úshin qarjy ınstıtýttaryna barýdyń, málimetterdi qaǵaz júzinde aparýdyń qajeti joq, qyzmetter onlaın-rejımde kórsetiledi.

Jalpy «AIRBA FF» JShS — tsıfrlyq tehnologııalardy toptastyrýmen qatar qoıma ınfraqurylymyn, kýrerlik jetkizý qyzmetin, tapsyrysyn klıenttiń ózi baryp alatyn pýnkt retinde de naqty sektorda jumys isteıdi. Bul – qoımalaý, magıstraldy logıstıka, klıentter pen seriktesterge jetkizip berý isimen aınalysatyn elimizdegi tuńǵysh operator.