Almaty oblysynda 150 brakoner jaýapqa tartyldy
TALDYQORǴAN. QazAqparat - Almaty oblysy aýmaǵynda polıtseıler bıyl tabıǵat qorǵaý zańnamasyn buzýdyń 162 deregin anyqtady, onyń 12 deregi boıynsha qylmystyq is qozǵap, sotqa deıingi tergeý amaldaryn júrgizdi, dep habarlaıdy QazAqparat tilshisi.
«Qorshaǵan orta men tabıǵı baılyqty qorǵaý maqsatynda qoldanystaǵy zańnamaǵa sáıkes osy kúnderi oblys aýmaǵynda «Brakoner» respýblıkalyq jedel-aldyn alý is-sharasy ótip jatyr. Múddeli tabıǵat qorǵaý organdarymen birlesip, brakonerlerdi anyqtaýǵa baǵyttalǵan aýqymdy jumystar atqaryldy. Aıta ketsek, jyl basynan beri brakonerlerden 22 ańshy qarýy tárkilendi. Onyń 7 zańsyz saqtalǵan, sondaı-aq eki jarym tonnadan astam balyq, atyp alynǵan 4 elik pen 1 qaban, sonymen qatar 34 sý tyshqany men ártúrli 20 qus tárkilendi»,- dep atap ótti Almaty oblysy PD Tabıǵatty qorǵaý polıtsııasynyń bastyǵy polıtsııa podpolkovnıgi Erlan Qojaqov.
Sonymen qatar, tártip saqshylary eki kún ishinde 41 quqyqbuzýshylyqty anyqtalǵan. Onyń ishinde zańsyz ań aýlaýdyń 28, zańsyz balyq aýlaýdyń 10 jáne zańsyz aǵash kesýdiń 1 deregi bar.
«Keıbir azamattar ań-qusty aýlaýda qatigezdik tanytatyn kezderi bolady. Atap aıtqanda, jaqynda polıtseıler túngi ýaqytta Іle ózeniniń jaǵasynda zańsyz balyq aýlaýmen aınalysqan Qarasaı aýdanynyń 31 jasar turǵynyn ustady. Kúdiktiniń elimizde paıdalanýǵa zańmen tyıym salynǵan, 10-15 metr qashyqtyqtaǵy tiri tirshilik ıelerin jappaı qyryp-joıatyn «elektrli qarmaqty» qoldanǵany anyqtaldy. Atalǵan derek boıynsha QR Qylmystyq kodeksiniń 335-babyna sáıkes sotqa deıingi tergeý amaldary júrgizilýde», - dep tolyqtyrdy podpolkovnık E. Qojaqov.
