Almaty oblysynda 15 jastaǵy oqýshy jol apatynan mert boldy
TALDYQORǴAN.QazAqparat - Almaty oblysynda 15 jastaǵy oqýshy jol apatynan mert boldy. Oqıǵany oblystyq bilim basqarmasyndaǵylar rastady, dep habarlaıdy QazAqparat tilshisi.
Oqys oqıǵa búgin Іle aýdanyndaǵy Baıserke aýylynda bolǵan. Oblystyq bilim basqarmasynyń málimetinshe, 8-synyp oqýshysy bazar mańynda ornalasqan shashtarazda jumys isteıtin anasyna bara jatqan. Sol kezde jasóspirimdi kólik qaǵyp ketken. Anyqtalǵandaı, 15 jastaǵy oqýshy kesheden beri sabaqqa barmapty.
«Nurbol 2018 jyldyń 13,14 aqpan kúnderi sabaqta bolmaǵan. Synyp jetekshisi Faızýllına Asel 13 aqpan kúni balanyń sabaqta bolmaǵandyǵyn anyqtaý maqsatynda anasyna qońyraý soqqanda uıaly telefony óshirýli bolǵan. 14 aqpan kúni úıine barǵanda Nurbol úıde bolmaǵan, 7-synypta oqıtyn inisi Týǵanbaı Maqsat saǵat 12:00-de shamasynda úıden shyǵyp ketkenin aıtqan. Nurboldyń qaıda ekendigin anyqtaý maqsatynda synyp jetekshisi anasynyń jumys ornyna barǵan. Sol jerde bir balany kólik qaǵyp ketkendigin estip, oqıǵa ornyna barǵanda anasy balasyn tanyǵan. Oqıǵa ornynda Nurbol birden qaıtys bolǵan», dep málim etti oblystyq bilim basqarmasy.
Qaıtys bolǵan Nurbol Týǵanbaı tolyq otbasynan shyqqan. Januıada 3 bala bar.
