Almaty oblysynda 15 jastaǵy oqýshy esh jerde tirkeýde joq
TALDYQORǴAN.QazAqparat - Almaty oblysynda Nádıra Qatyran esimdi oqýshy qyz Qazaqstannyń esh jerinde tirkeýde joq. 15 jastaǵy jasóspirimniń qolynda tek Qytaıda týǵanyn rastaıtyn kýáligi ǵana bar, dep habarlaıdy QazAqparat tilshisi.
Panfılov aýdanynyń Sholaqaı aýylynda turyp jatqan Nádıranyń ata-anasy balasy QR azamattyǵyn ala almaı qalady dep alańdaýly.
«2004 jyly Qytaıdyń Qorǵas aýdanynan januıamyzben 10 adam kóship keldik. Olardyń arasynda bir jarym jastaǵy Nádıra da bar. Sol kezde otbasynyń 9 múshesin tirkeýge alǵan kóshi-qon polıtsııasy nárestege kelgende beıqamdyq tanytty. Qazir balamyz esh jerde tirkeýde joq», - deıdi Nádıranyń atasy Qurmanaqyn Qalı.
Atasynyń aıtýynsha, Nádıra tirkeýge alynbaǵannyń zardabyn endi tartyp jatyr. Qytaıdan alǵan tólqujaty men týý týraly kýáligi bolsa da Qazaqstanda qujatsyzdar sanatynda eken. Sonyń kesirinen aýyldan attap shyǵa almaıdy.
«Bul oqýda ozat oqýshyǵa ońaıǵa tıip jatqan joq. Talaı pán olımpıadalaryna qujattyń kesirinen qatysa almaı qaldy. Otbasynyń úlkenderi tirkeýge alynbaǵan qyzdyń máselesin aıtyp talaı quzyrly organdardyń esigin qaqtyq. Alaıda qulaq salǵan eshkim bolmady», - deıdi atasy.
Nádıra kelesi jyly 16-ǵa tolady. ıAǵnı, jeke kýálik alýy tıis. Qurmanaqyn ata aýdan ortalyǵynda qoǵamdyq qabyldaý ótkizgen oblystyq máslıhat depýtaty Zákirjan Kýzıevten kómek surady. Endi kóshi-qon polıtsııasyndaǵylar bul máseleni sheshýge qaıta kirispek. Onyń barysyn halyq qalaýlysy óz baqylaýyna alatyn boldy.
