Almaty oblysynda 15 laýazymdy tulǵa kásipkerlerdiń quqyǵyn buzǵany úshin jazalandy
Bul týraly oblystyq Kásipkerler palatasy dırektorynyń quqyqtyq máseleler jónindegi orynbasary — kásipkerlerdiń quqyqtaryn qorǵaý jónindegi mobıldi toptyń múshesi Qanat Qabdıev málimdedi.
Onyń aıtýynsha, jyl basynan beri quramynda «Atameken» men prokýratýra organdarynyń ókilderi bar bıznestiń quqyqtaryn qorǵaý jónindegi mobıldi topqa kásip ıelerinen 65 ótinish kelip túsken. Atalmysh faktiler boıynsha zańdylyqty buzýshylyqty joıý týraly 26 usynys, alty narazylyq engizildi, sondaı-aq jedel-izdestirý is-sharalarynyń júıesi iske asyryldy.
Qanat Qabdıev 4 qyrkúıekten bastap «Prokýratýra týraly» Zańǵa túzetýler kúshine engenin eske saldy. Jańa ózgeristerge sáıkes prokýrorlarǵa kásipkerlerdiń memlekettik organdar tarapynan aralasý faktileri boıynsha ótinishterin qaraý quzyreti berildi. Al buryn mundaı ótinishter ýákiletti organdarǵa jiberiletin. Endi prokýrorlar bıznes sýbektileriniń shaǵymdaryna jedel áreket etip, olar boıynsha tekserýler júrgize alady, qajetti aqparatty ózderi belgilegen merzimde surata alady jáne túsinikteme alý úshin adamdardy shaqyra alady. Budan basqa, prokýrorlar shottardy negizsiz tyıym salý, múlikti paıdalanýǵa tyıym salý, qyzmetin toqtata turý, jumystaǵy ýaqytsha jáne ózge de shekteýler sııaqty zańsyz salynǵan shekteý jáne tyıym salý sıpatyndaǵy sharalardyń kúshin dereý joıa alady.
Mundaı faktiler anyqtalǵan kezde prokýror olardyń kúshin joıý týraly qaýly shyǵarady, ol oryndaý úshin mindetti bolady. Qaýlyny oryndamaǵany úshin bir mezgilde ákimshilik jaýaptylyq engiziledi (ÁQBtK – niń 664-1-baby-30 AEK-ke deıin aıyppul salýǵa ákep soǵady).
«Almaty oblysynyń Kásipkerler palatasy men prokýratýrasynyń birlesken jumysy barysynda 10 zańsyz aktiniń kúshi joıyldy, 155 zańsyz tekserý jáne baqylaýdyń ózge de nysandary anyqtaldy, sondaı-aq 24 zańsyz tekserý joıyldy. Kásipkerlerdiń quqyqtaryn buzý faktileri boıynsha 15 laýazymdy tulǵa tártiptik jaýapkershilikke tartyldy, 20 bıznes sýbektisin ákimshilik jaýapkershilikke zańsyz tartýǵa jol berilmedi jáne jalpy sosmasy 125 000 teńge bolatyn 125 ákimshilik qaýly joıyldy. Jalpy, óńirdiń 8 myńnan astam kásipkerlik sýbektileriniń quqyqtary qorǵaldy», - dep atap ótti «Atameken» ÓKP dırektorynyń orynbasary Qanat Qabdıev.
Oblys prokýratýrasy júrgizgen jedel is-sharalar nátıjesinde Tekserý komıssııasynyń qyzmetkerleri 90 kásipkerden 17 mln teńge kóleminde para alǵan kezinde ustaldy. Sot úkimimen laýazymdy tulǵalar kináli dep tanyldy. Sondaı-aq, 717 jekemenshik balabaqshanyń jan basyna shaqqandaǵy qarjylandyrý mólsheri sáıkestendirildi.
Mobıldik toptyń kúshimen memlekettik satyp alýdyń 23 qatysýshysyna tapsyrys berýshiler zańsyz qaıtarmaǵan kepildik jarnalar qaıtaryldy.
Sonymen birge, sanıtarlyq dárigerlerdiń qaýlylary alynyp tastalyp, qaıta qaraldy. Osyǵan deıin kásipkerler qaýly aıasynda zańsyz shekteýlerge jol berilgendigi týraly shaǵymdanǵan bolatyn.
«Kásipkerler júginip, aýdandar men qalalardyń sanıtarlyq dárigerleriniń qaýlylaryn talqylaǵannan keıin mobıldi top sanıtarlyq dárigerlerdiń bıznes quqyǵyn buzatyn tórt karantındik buıryǵyn joıyp, ózgertti. Sonymen qatar, biz 20 shaǵyn kásipkerlik sýbektisiniń quqyqtaryn qorǵadyq, olardy polıtsııa qyzmetkerleri karantındik shekteýlerdiń saqtalýyn zańsyz teksergeni anyqtaldy», - dedi Almaty oblysy prokýrorynyń orynbasary Marat Ábdirahmanov.
Alakól aýdanynyń bilim berý uıymdarynda ashanalar men býfetterdi jalǵa alatyn kásipkerlerdiń ujymdyq ótinishi de bıznes paıdasyna sheshildi. Belgili bolǵandaı, Ulttyq ekonomıka mınıstriniń pandemııa kezinde memlekettik jyljymaıtyn múlik obektisiniń jaldaý aqysyn eseptemeý týraly buıryǵyna qaramastan, jergilikti atqarýshy organdar 21 kásipkerden tólem aldy. Aýdan prokýratýrasynyń usynysy boıynsha artyq tólengen qarajat somasy qosymsha kelisimmen 2021 jylǵa esepteldi.
Bıznestiń júıeli problemalyq máseleleri kásipkerlik ókilderi men ýákiletti memlekettik organdardyń qatysýymen «Atameken» ÓKP janyndaǵy Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńes alańynda belsendi qaralyp, sheshilýde.
«Atamekenmen» birlesken jumystyń nátıjesinde búgingi tańda bıznestiń úsh problemalyq máselesi júıeli máseleler tizilimnen alynyp tastaldy. Qazirgi ýaqytta eki óńirlik jáne bir respýblıkalyq problemalyq másele bar. Mysaly, ınfektsııalyq jáne provızorlyq statsıonarlardyń jumysyna tartylǵan medıtsına qyzmetkerlerin tasymaldaý, turý jáne ornalastyrý boıynsha kórsetilgen qyzmetter úshin kásipkerlik sýbektilerine tólem jasaý problemalary týraly júıeli máseleni Keńes otyrysyna shyǵaryp, qarastyryldy. Onda densaýlyq saqtaý mekemeleriniń bıznes sýbektileri aldyndaǵy bereshegin óteý tetigi pysyqtaldy. Prokýrorlyq qadaǵalaý aktisi boıynsha bıznes sýbektilerine tıisti qarajat tolyq kólemde tólendi, kináli adamdarǵa qatysty jaýapkershilik týraly másele tártiptik komıssııalarda qaralady», - dep atap ótti Marat Ábdirahmanov.
Esterińizge sala keteıik, Almaty oblysynda Kásipkerlerdiń quqyqtaryn qorǵaý boıynsha mobıldi top jumys isteıdi. Mobıldi toptyń mindeti - kásipkerlik sýbektileriniń quqyqtaryn buzý jáne zańdy kásipkerlik qyzmetke kedergi jasaý týraly sıgnaldaryna jedel áreket etý. Senim telefondary+7 7282 24 06 31, +7 778 169 77 79, +7 777 246 6642.
