Almaty oblysynda 15-16 jastaǵy eki qyz úılerinen qashyp, Almatydaǵy metroǵa túnep shyqqan
TALDYQORǴAN. QazAqparat - Almaty oblysynyń polıtseıleri iz-túzsiz joǵalǵan eki qyzdyń jyldam tapty, dep habarlaıdy QazAqparat tilshisi.
Almaty oblystyq polıtsııa departamenti baspasóz qyzmetiniń málimetinshe, joǵalǵan qyzdar Almatyda serýendeý maqsatynda ata-analaryna eskertpeı, úılerinen qashyp ketkeni belgili boldy.
7 shilde kúni Jambyl aýdanynyń polıtsııasyna joǵalǵan qyzdardyń biriniń anasy kelip, onyń 15 jasar qyzyn taýyp berýge kómek suraǵan. Jasóspirim 6 shilde kúni keshke belgisiz baǵytta úıden shyǵyp, qaıtyp oralmaǵan.
Tártip saqshylary jedel izdestirý sharalary barysynda iz-tússiz joǵalǵan qyzdy 16 jasar qurbysynyń qasynda júrgenin jáne qurbysynyń da úıinde joq ekenin anyqtaǵan. Іz kesýshiler sol kúni-aq qurbylardyń Almaty qalasyndaǵy mekenjaıyn shuǵyl belgilep, ıývenaldy polıtsııa ınspektorymen birlesip, jedel ýákilder qyzdardy aman-esen ata-analaryna qaıtardy.
Úılerinen shyqqan olardyń Almaty qalasyna taksımen jetkeni, metroǵa túnep shyqqany belgili boldy. Kelesi kúni Arbat mańynda serýendep, keshke páter jaldaý úshin vokzalǵa kelgen qos qurbyny tártip saqshylary kútip alǵan. Al, olar qalada qydyrý úshin úılerinen qashyp ketkenin aıtqan.
Kámeletke tolmaǵandardyń ata-analaryna qatysty QR ÁQBtK-niń 127-babynyń 1-bóligine sáıkes ata-ana mindetterin tıisinshe oryndamaǵany úshin jaýapkershilikke tartý týraly ákimshilik materıal jasaldy, al kámeletke tolmaǵandardyń ózderi profılaktıkalyq esepke alyndy.
