Almaty oblysynda 140 myńnan astam adam jer kezeginde tur
TALDYQORǴAN.QazAqparat - Almaty oblysynda 140 myńnan astam adam jer kezeginde tur. Búgin bul jóninde Investıtsııalar jáne damý mınıstri Jeńis Qasymbek Úkimet basshysynyń jetisýlyqtarmen kezdesýi barysynda málim etti, dep habarlaıdy QazAqparat tilshisi.
Basqosýda Jeńis Qasymbek oblys turǵyndaryna «Nurly jer» baǵdarlamasynyń júzege asyrylýyn túsindirdi. Sondaı-aq mınıstr atqarýshy bılikke jer telimin taratpas buryn ınfraqurylymyn retke keltirip jáne bul jumysty jedeldetýdi tapsyrdy.
Jalpy bıyl Almaty oblysynda «Nurly jer» baǵdarlamasy boıynsha kólemi 12,2 myń sh.m bolatyn turǵyn úı qurylysy josparlanýda. Sonymen qatar oblys ortalyǵynda 2017 jyly ońtústik-batys turǵyn úı alabynda 873 páterge arnalǵan 9 úıdi paıdalanýǵa berý kózdelgen. Joba quny - 6 107,1 mln.teńge.
Esterińizge sala keteıik, búgin QR Premer-Mınıstri Baqytjan Saǵyntaev Almaty oblysyna jumys saparymen keldi. Úkimet basshysy Elbasy Joldaýyndaǵy tapsyrmalardyń oryndalýyn pysyqtap, óńirdiń áleýmettik-ekonomıkalyq damýymen tanysty. Baqytjan Saǵyntaevpen birge oblysqa 4 mınıstr kelip, óz salalary boıynsha memlekettik baǵdarlamalardyń júzege asyrylý barysyn túsindirdi. Olardyń qatarynda Bilim jáne ǵylym mınıstri Erlan Saǵadıev, Eńbek jáne halyqty áleýmettik qorǵaý mınıstri Tamar Dúısenova jáne Densaýlyq saqtaý mınıstri Eljan Birtanovtar bar.
