Almaty oblysynda 14 myń halyq turatyn aýdan ortalyǵy Saryózekte ishetin sý joq

TALDYQORǴAN. QazAqparat - Almaty oblysynyń bildeı bir aýdan ortalyǵy Saryózekte sý joq, dep habarlaıdy QazAqparat tilshisi.

Halyq ishetin tirshilik nárin qaıdan alaryn bilmeıdi. Máseleniń ýshyqqany sonsha, turǵyndarǵa sýdy áskerıler kólikpen tasyp álek.

Al ákimdiktegiler Saryózektiń sý máselesin sheshý úshin qomaqty qarjy kerek dep otyr.

«Kúndizgi saǵat 14:00 beri kútip otyrmyz. Áne kelemiz, mine kelemiz deıdi. Qazir saǵat túngi 23:00 boldy. Qashan Maqataev kóshesine sý keledi? Mynaý degen sumdyq boldy. Sháı ishýden qaldyq, jýyný bylaı tursyn»,- deıdi Saryózek aýylynyń turǵyndary.

Saryózektikter sý tasıtyn kólik osylaı túnniń bir ýaǵyna deıin kelmeıdi deıdi. Tipti sý jetkizý úshin turǵyndar taksı jaldap, shyǵyndanýǵa májbúr.

«Taksımen keldim minekeı. 2 myń teńge aqshasyn tóledim. Endi, mine, sýymdy alyp turmyn»,- deıdi Saryózek aýylynyń turǵyny Nurlan Baıǵabylov.

«Mine, bir jeti boldy, sý joq. Sý tasıtyn kólikter birde keledi, birde kelmeıdi»,- deıdi aýyl turǵyny Saltanat Egeýbaeva.

Saryózek halqy qashanǵa deıin bótelkemen sý tasyp, ómir súretini belgisiz. Sebebi, jer astyndaǵy sý qubyrlary tozyp, keıbiri jarty ǵasyrdan astam ýaqyttan beri jańartylmaǵan.

Sý sorý qondyrǵylary birinen soń biri isten shyǵyp jatyr. Mundaǵy sý máselesin sheshý úshin 1 mlrd teńgeden astam qarajat kerek.

«Jobasy ázirlengen. Qazir 1 mlrd 73 mln teńge qarajat qajet. Oǵan qajetti barlyq bıýdjettik ótinim berilgen. Respýblıkalyq bıýdjetten qalaı qarajat bólinedi, solaı jumys bastalady. Qarajattyń bólinýine qarap otyrmyz», - deıdi Kerbulaq aýdandyq turǵyn úı kommýnaldyq sharýashylyǵy bólimi basshysynyń mindetin atqarýshy Medet Sopbaev.

Saryózekte 14 myńnan astam halyq turady.

Qazir osy aýdan ortalyǵyndaǵy halyqtyń jartysynan kóbi ishetin sý tappaı, sý tasıtyn kólikti tosyp, kún keship otyr.