Almaty oblysynda 14 177 túlek mekteppen qoshtasty
TALDYQORǴAN. QazAqparat - Búgin Almaty oblysynda 14 177 túlek mekteppen qoshtasty. 565 oqýshy «Altyn belgige» jáne 366 túlek erekshe úlgidegi attestatqa úmitker. Olardyń 10-y - Taldyqorǵandaǵy úsh tilde oqytatyn daryndy balalarǵa arnalǵan № 20 lıtseıdiń oqýshylary. Búgin óńir basshysy Amandyq Batalov osy bilim ordasyna arnaıy baryp, oqýshylardy oqý jylynyń aıaqtalýymen quttyqtap, mektep bitirýshilerge aq jol tiledi, dep habarlaıdy QazAqparat tilshisi.
"Qurmetti túlekter! Búgingi kún sender úshin qýanyshty da tolqynysty sát. Sońǵy qońyraýdyń soǵylýy balalyq shaqpen qoshtasyp, úlken ómirge qadam jasaǵan mańyzdy shaqtyń ýaqyty kelgenin bildiredi. Kópshiligiń bolashaqqa jospar quryp, maqsattaryńdy aıqyndap ta qoıǵan bolarsyńdar. Sol asyl armandaryń men izgi maqsattaryńa jetýlerińe tilektespin. Eń bastysy ózderińe senimdi, qıyndyqqa moıymaıtyn, alǵa qaryshtap qadam jasaı alatyn eljandy azamat bolyńdar. Ata-analaryń men ustazdaryń senderge bar tálim-tárbıesi men bilimin aıamaı boılaryńa darytty. Endi senderge eline eńbek eter azamat bolar degen úlken úmit artamyz. Aq jol bolsyn, jas túlekter!" - dedi A. Batalov.
Dástúr boıynsha saltanatty jıynda úzdikter, túrli olımpıadalar men sporttyq jarystardyń jeńimpazdary qurmet gramotalary, dıplomdarmen marapattaldy. Lıtseıdiń túlekteri men oqýshylary búgingi saltanatty sharaǵa oraı ázirlegen baǵdarlamasy barysynda mánerlep óleńder oqyp, ánderin úsh tilde naqyshyna keltirip oryndady. Munan soń túlekter ustazdaryna alǵys aıtyp, mektep valsin bıledi. Jınalǵandar Sońǵy qońyraýda shertilgen ásem áýenmen túlekterdi sońǵy sabaqqa shyǵaryp saldy. Túlekterdiń sońǵy sabaqtaryna oblys ákimi Amandyq Batalov ta qatysty.
