Almaty oblysynda 1300-den astam polıtseı oqýshylardyń qaýipsizdigin qadaǵalady

TALDYQORǴAN. QazAqparat - Bilim kúninde tártip saqshylary Almaty oblysynyń barlyq mektepterinde qaýipsizdikti qamtamasyz etti. Bul jumystarǵa 1300-den astam polıtseı jumyldyryldy, dep habarlaıdy QazAqparat tilshisi.

Búgin Almaty oblysyndaǵy barlyq bilim shańyraǵynda merekelik sharalar uıymdastyryldy. Polıtseıler merekelik kóńil-kúıdiń buzylmaýyna barynsha úles qosyp, oqýshylardyń qaýipsizdigin joǵary deńgeıde qamtamasyz etýge tyrysyp baqty.

Oblystyq Polıtsııa departamenti baspasóz qyzmetiniń málimetinshe, óńir boıynsha 1300-den astam tártip saqshysy mektep mańyndaǵy joldarda, jaıaý júrginshiler ótkelderinde qyzmet atqardy. Bıylǵy oqý jylynda qosymsha 130 aqparattyq-eskertý belgileri ornatylyp, joldarǵa 36 jasandy kedergiler tóseldi.

«Sondaı-aq jaıaý júrginshiler jolaǵyna oqýshylardyń 140-qa jýyq maketi qoıyldy. Maketter kólik júrgizýshileriniń qyraǵylyǵyn arttyryp, jyldamdyqty tómendetip, saq júrýine yqpal etýde», - deıdi vedomstvo ókilderi.