Almaty oblysynda 13 úıdi tonaǵan qylmystyq top ustaldy
TALDYQORǴAN. QazAqparat - Taldyqorǵanda arnaıy operatsııa barysynda eldiń múlkin urlaýmen aınalysqan kúdikti úsh azamattan quralǵan uıymdasqan qylmystyq top ustaldy, dep habarlaıdy QazAqparat tilshisi.
«Bes aı ishinde Taldyqorǵanda jeke menshik úılerdegi urlyq derekteri tirkelip otyrdy. Negizinen urylar plastık terezeler arqyly, keı jaǵdaıda esikterge kilt tańdaý arqyly úıge kirgen. Tek baǵaly zattardy - altyn, aqsha, teledıdar, noýtbýk, telefon jáne basqa da múlikterdi qoldy qylǵan», - deıdi Taldyqorǵan QPB Batys polıtsııa bólimi bastyǵynyń orynbasary, polıtsııa maıory Azamat Mastekbaev.
Polıtseılerdiń nazaryn qonaqúılerdiń birinde bólme jaldap turyp jatqan jas jigitter aýdarǵan. Belgilengen baqylaý kóp uzamaı oń nátıjesin berdi.
«Kezekti urlyq dereginen keıin aýyldyq jerden kelgen 23, 26 jáne 27 jastaǵy kúdiktiler ustaldy. Tintý kezinde olardan urlanǵan zattardyń bir bóligi jáne eki tasymaldy radıostantsııa alyndy. Ustalǵandar 13 urlyqty tolyq moıyndady, biraq olardyń basqa ózge de osyǵan uqsas ashylmaǵan qylmystarǵa qatysy bar-joǵy tekserilýde, tizim áli de keńeıe túsýi múmkin»,-dep tolyqtyrdy maıor Mastekbaev.
Sonymen qatar, eki azamattyń ótken jyly osyǵan uqsas qylmystary úshin bas bostandyǵynan aıyrylǵandyǵy anyqtaldy. Topty sottylyǵy ótelmegen eń jas qatysýshy basqarǵan. Onyń bastamasy boıynsha, ustalǵandar portatıvti radıobaılanysty paıdalanyp, ratsııa arqyly qylmystyq top múshesi júrgizýshi úı ıeleriniń jaqyndaǵanyn nemese basqa da qaýipti eskertip habarlap otyrǵan.
Almaty oblystyq polıtsııa departamenti baspasóz qyzmetiniń málimetinshe, kúdiktiler qamaqqa alyndy. Sotqa deıingi tergeý QR QK 188-babynyń 3-bóligine sáıkes júrgiziledi.
Sot sheshimine deıin avtokólik aıǵaq zat retinde tárkilenip, arnaıy turaqqa qoıyldy.
