Almaty oblysynda 120-dan astam jylqy urlaǵan barymtashy ustaldy
TALDYQORǴAN. QazAqparat - Almaty oblysy aýmaǵynda 120-dan astam jylqyny barymtalaǵan azamat ustaldy. Kúdikti buǵan deıin de mal urlyǵymen isti bolǵan Eńbekshiqazaq aýdanynyń 28 jasar turǵyny bolyp shyqty, dep habarlaıdy Qazaqparat tilshisi.
Jambyl aýdanynyń ishki ister bólimine 17 jeltoqsanda jylqymen aınalysatyn kásipker shaǵymdanyp, belgisiz bireýlerdiń 63 bas jylqyny aıdap áketti dep habarlaǵan. Kelesi kúni taǵy bir jylqyshy 31 bas malynyń joǵalǵanyn málimdegen.
Sondaı-aq, 19 jeltoqsanda tártip saqshylaryna Іle aýdanynyń turǵyny 27 bas jylqysynyń urlanǵanyn aıtyp shaǵym túsirgen.
Jedel izdestirý shara barysynda barymtashy ustaldy. Jazanyń aýyr bolatynyn túsingendikten kúdikti jylqy urlaǵanyn moıyndap 63 bastyń qaı jerde turǵanyn aıtqan. Qazirgi tańda urlanǵan mal ıelerine qaıtarylyp, qalǵan jylqylar izdestirilýde. Atalǵan fakti boıynsha QR QK 188- babyna sáıkes qylmystyq is qozǵalyp, tergeý jalǵasýda. Keltirilgen shyǵyn birneshe mıllıon teńgege baǵalanǵan. Kúdikti qamaýǵa alyndy.
