Almaty oblysynda 117 keli zańsyz balyq aýlaǵan brakonerler ustaldy
TALDYQORǴAN. QazAqparat - Almaty oblysynyń tártip saqshylary zańsyz balyq aýlaǵan brakonerlerdi ustady. Olardan 117 kılogramm zańsyz balyq tárkilendi, - dep habarlaıdy QazAqparat tilshisi.
Almaty oblystyq Polıtsııa Departamenti baspasóz qyzmetiniń málimetinshe, 11 mamyr kúni Almaty oblysy aýmaǵynda tabıǵatty qorǵaý organdarymen birlesken arnaıy is-shara barysynda Uıǵyr aýdanynyń polıtseıleri zańsyz balyq aýlaǵan 3 azamatty ustady. Brakonerler mingen «Toıota-Land Krýzer» avtokóliginiń júksalǵyshynan ustalǵan balyqtar men balyq aýlaýǵa arnalǵan qural-jabdyqtar tabyldy.
«Oblystyq «Ýyldyryq shashý» jedel aldyn alý is-sharasy barysynda Uıǵyr aýdanynda júrgizilgen shara kezinde 28, 35 jáne 42 jastaǵy úsh jergilikti turǵyn ustaldy. Olardyń kóliginen 117 kılogramm balyq pen rezeńke qaıyq jáne balyq aýlaıtyn aý tabylyp, tárkilendi. Atalǵan derekke qatysty QR Qylmystyq kodeksiniń 335-babynyń 3-tarmaǵyna sáıkes sotqa deıingi tergeý amaldary júrgizilip jatyr»,- dedi Almaty oblysy PD JPQB Tabıǵat qorǵaý ınspektory Baǵlan Rymjanov.
Polıtseıler taratqan aqparatqa sáıkes, brakonerler keltirgen materıaldyq shyǵyn 420 myń teńgeden asqan.
Sonymen qatar, kúdiktilerden tárkilengen balyqtar arnaıy balyq qabyldaǵysh oryndarǵa ótkizildi jáne odan túsken qarjy memleket paıdasyna aýdarylatyn bolady.
Esterińizge sala keteıik, oblystyq «Ýyldyryq shashý» jedel aldyn alý is-sharasy oblys aýmaǵynda 2020 jyldyń 15 sáýirinen mamyr aıynyń sońyna deıingi aralyqta júrgiziledi. Shara balyqtardyń ýyldyryq shashý kezinde jappaı ustalýynyń aldyn alý, tabıǵı baılyqqa qol suǵýshylyqty boldyrmaý maqsatynda ótkizilýde. Arnaıy maýsym barysynda tártip saqshylary tabıǵat qorǵaý zańnamasyn buzýdyń 80 astam deregin áshkereledi. Onyń ishinde 12 derek boıynsha qylmystyq óndiris qozǵaldy.
