Almaty oblysynda 11 jasar bala eki jyldan beri mektepke barmaǵan
TALDYQORǴAN.QazAqparat - Almaty oblysynda Álıhan Áıtkenov esimdi oqýshy eki jyldan beri mektepke barmaǵan. Aýyl balasy sońǵy ret mektep partasyna 2018 jyldyń aqpan aıynda, ıaǵnı 4-synypta otyrǵan. Ol qazir 6-synypta oqýy tıis, dep habarlaıdy QazAqparat tilshisi.
Balanyń qatarlastarynan qalyp, sabaqqa barmaýyna synyptastarynyń uryp-soǵýy sebep bolypty.
«Mektepten shyǵyp, dalada balalarmen oınap júrgende artymnan tórteýi keldi de, eki qolymnan ustap, qalǵan ekeýi ishimnen tepti. Sodan soń qarǵa batyrdy», - deıdi oqýshy Álıhan Áıtkenov.
Ol balalardyń ózin qorlaǵanyn da jetkizdi. Adam aýzy barmaıtyn sumdyq jaıt Kerbulaq aýdanyna qarasty Jolaman aýylynda bolǵan. Anasynyń aıtýynsha, sol kúngi soqqydan balasynyń ishinen qan ketip, qan qusyp, aýdandyq aýrýhanaǵa jetkizilgen.
«Balam bir aı, on kún aýrýhanada em aldy. Saryózekte, keıin Taldyqorǵannyń aýrýhanasynda jatty. Sońynda ákimshilik, organdar, bilim salasy - bári meniń ózime jala jaýyp, mine, sotqa da shaqyryp, analyq quqyǵymnan aıyramyz dep aıtpaǵandy aıtty. Úsh jyldan beri túrli qıyndyqty bastan ótkizip kelemiz», - deıdi Álıhan Áıtkenovtyń anasy Áıken Ýnımdınova.
Al Almaty oblysy bilim basqarmasyndaǵylar oqýshynyń mektepke barmaýyna anasy kináli dep sanaıdy. Jáne anasynyń qoıyp otyrǵan «barlyq jaýaptylar jazalanýy kerek» degen talaby negizsiz deıdi.
«Jolaman orta mektebiniń oqýshysy mektepke kelmegeli úshinshi oqý jylyna aıaq basyp otyr. Bul máseleni prokýratýra da qarady, sotqa da berildi. Nur Otan partııasy janynan qurylǵan balalardyń quqyǵyn qorǵaý jumys tobynyń qaraýynan da ótti. Ol kisilermen aqparattyq túsindirý jumysy júrgizildi. Mektep tarapynan, mektep ákimshiligi tarapynan balaǵa eshqandaı qysym bolyp turǵan joq. Balany óz ata-anasy jibermeı otyr. Ondaǵy ata anasynyń mektepke qoıyp otyrǵan talaby - balasynyń burynǵy synyp jetekshisin, mektep basshylyǵyn jumystan shyǵarý», - deıdi Almaty oblystyq bilim basqarmasy tárbıe jumysy bóliminiń basshysy Aınagúl Úshkempirova.
Álıhan eki jyldan beri mektepke barmaı, qatarlastarynan qalyp, úıde anasy ekeýi óz betinshe sabaq oqyp júr. Balanyń armany - mektepke barý. Al anasy jalǵyz ulynyń qaýipsizdigine alańdaıdy.
«Bir aıdan astam ýaqyt aýrýhanada jatqan balanyń isi jabylyp qalǵany úreıimdi tipten údetip jiberdi», - deıdi sharasyz ana.
Sol sebepti oqýshynyń anasy ádildiktiń ornaýyn talap etip otyr.
