Almaty oblysynda 107 jas maman memlekettik baǵdarlamaǵa qatystyrylmaǵan
TALDYQORǴAN. QazAqparat - Almaty oblysynyń Kegen aýdanynda 107 jas mamannyń «Dıplommen aýylǵa» memlekettik baǵdarlamasyna qatysýyna múmkindik bermegen, dep habarlaıdy «QazAqparat» HAA.
Bul týraly Memlekettik qyzmet isteri jáne sybaılas jemqorlyqqa qarsy is-qımyl agenttiginiń óńirlik departamentiniń Ádep jónindegi keńesiniń otyrysynda málim boldy. Keńes músheleri aýdandyq ekonomıka jáne bıýdjetti josparlaý bóliminiń basshysyna qatysty tártiptik isti qaraǵan.
«Tekserý barysynda 189 jas maman «Dıplommen aýylǵa» baǵdarlamasymen bıýdjettik nesıege úmitker bolǵan. 82 mamannyń tapsyrysy qanaǵattandyrylyp, eńbek jolyn aýylda bastaımyn degen 107 jas mamannyń qujattary arnaıy komıssııaǵa kirgizilmegen», - dep málim etti atalǵan vedomstva ókilderi.
Ádep jónindegi keńes músheleri bólim basshysynyń qyzmetine sáıkes emes degen eskertý berý arqyly tártiptik jaýapkershilikke tartý týraly usynys jasady.
