Almaty oblysynda 100-ge jýyq áskerı blokpostaǵy qyzmeti úshin marapattaldy

TALDYQORǴAN. QazAqparat - Almaty oblysynda polıtseıler áskerı qyzmetkerlerge blokpostaǵy qyzmeti úshin alǵys aıtty, dep habarlaıdy QazAqparat tilshisi.

Tótenshe jaǵdaı rejıminiń aıaqtalýyna baılanysty blokposty kúsheıtý, eldi mekenderdi dezınfektsııalaý jáne patrýldeý maqsatynda kezekshilikke tartylǵan Qazaqstan Respýblıkasy Qarýly Kúshteriniń jeke quramy men áskerı tehnıkasy turaqty pýnkterine oraldy. Osyǵan oraı Qarasaı aýdandyq polıtsııa basqarmasynyń basshylyǵy men qyzmetkerleri Almaty mańyndaǵy blokposta qyzmet kórsetken Qarýly Kúshterdiń jeke quramyna rızashylyǵyn bildirdi.

«Áskerı qyzmetshiler mindetin oryndaý kezinde eren eńbek atqardy. Tótenshe jaǵdaı rejımi el aýmaǵynda engizilgen sátten bastap iri megapolıs - Almaty qalasymen janasatyn beketterge 87-den astam áskerı garnızon qyzmetkeri tartyldy. Búginde 100-ge jýyq áskerı qyzmetshi óńir basshylyǵy men Almaty oblysy polıtsııa departamentiniń atynan marapattaldy. Qarýly Kúshterdiń jeke quramyna shyn júrekten alǵys aıta otyryp, memleket qaýipsizdigin, el azamattarynyń ómiri men densaýlyǵyn qamtamasyz etý jáne saqtaý isinde tabys tileımiz», - dep atap ótti Almaty oblysy Qarasaı aýdandyq polıtsııa basqarmasynyń bastyǵy, polıtsııa polkovnıgi Ashat Danııar.

Al polıtsııa jáne medıtsına qyzmetkerleri Almaty mańyndaǵy posttaǵy qyzmetin ármen qaraı jalǵastyryp jatyr.