Almaty oblysynda 100-den asa adam kásipker atandy
TALDYQORǴAN. QazAqparat - Almaty oblysynda Memlekettik baǵdarlama boıynsha oqýǵa qatysqan 100-den astam adam kásipker bolyp tirkeldi. Oqytý "Bıznes-Keńesshi" jobasy aıasynda ótti, dep habarlaıdy QazAqparat tilshisi.
Almaty oblysynyń Kásipkerler palatasy 2017 jyldyń birinshi jartyjyldyǵynda ótken "Bıznes-Keńesshi" jobasyn qorytyndylady. Tegin oqytý "Bıznestiń jol kartasy - 2020" baǵdarlamasynyń tórtinshi baǵyty boıynsha iske asyrylýda. Oǵan ekonomıkanyń kez kelgen salasyndaǵy shaǵyn jáne orta bıznes sýbektileri jáne kásipkerlik yntasy bar turǵyndar qatysa alady. Kýrs aıasynda jeke bıznesti ashý, marketıng, adamı resýrstardy basqarý, kásipkerliktiń quqyqtyq negizderi men qarjy saýattylyǵy boıynsha eki kúndik oqý qarastyrylǵan. Bıznes-trener Aleksandr Kýznetsovtyń málimetinshe, 2017 jyldyń birinshi jartyjyldyǵynda Almaty oblysy boıynsha "Bıznes-Keńesshi" jobasynda 876 adam oqytylǵan. Onyń 544-i jeke tulǵa, qalǵany kásipkerler bolyp tabylady. Genderlik erekshelik boıynsha oqytýǵa 63,24% er adamdar, 36,76% áıelder qyzyǵýshylyq bildirgen. Jobanyń eń jas qatysýshysy 17 jasta bolsa, úlkeni 57-de.
"Oqytý boıynsha alynǵan sertıfıkat memlekettik grantar konkýrsyna qatysýǵa, memlekettik baǵdarlamalar aıasynda nesıe alýǵa múmkindik beredi. Jobanyń tıimdiligin biz qatysýshylardyń kásipkerlik qyzmetke tartylý, qarjylandyrýǵa qol jetkizý sııaqty kórsetkishteri boıynsha baǵalaımyz. Máselen, oqýdan ótken qatysýshylardyń 105-i kásipker retinde tirkelgen. Olardyń kópshiligi jeke kásipterin ashqan, beseýi aýyl sharýashylyǵy kooperatıvin (AShK), taǵy bireýi sharýa qojalyǵyn tirkegen", - dep atap ótti A.Kýznetsov.
Mysaly, Tekeli qalasynyń turǵyny Nurǵısa Aǵybaev oqýdy sátti aıaqtaǵan soń, birden kásipker retinde tirkelgen. Sharýa qojalyǵyn quryp, mal sharýashylyǵyn damytýmen aınalysýda. Tyńdaýshylardyń pikirinshe, "Bıznes-Keńesshi" kooperatıv ashýǵa túrtki boldy. Qaratal aýdanynan qatysqan azamattardyń birqatary AShK ashyp, belsendi túrde kásipterin júrgizýde. Anna Shıngojına "Alma Sút" atty kooperatıvti tirkep, qazirgi tańda sútti ótkizýmen aınalysady. Aýdannyń taǵy bir turǵyny Máýlet Mazǵutov "Baıǵara" kooperatıvin quryp, iri qara sanyn kóbeıtýde.Sonymen qatar, "Bıznes-Keńesshiniń" 24 tyńdaýshysy "Bıznestiń jol kartasy - 2020" baǵdarlamasy aıasynda qarjylandyrýǵa ótinim bergen. Taǵy 45 kásipker Nátıjeli jumyspen qamtý jáne jappaı kásipkerlikti damytý baǵdarlamasy boıynsha beriletin nesıege úmitker. Semınardyń 70 qatysýshysynyń ótinishi Aýyl sharýashylyǵyn qarjylaı qoldaý qorynda qarastyrylý ústinde.
