Almaty oblysynda 10 jyl qańyrap turǵan qant zaýyty iske qosyldy

TALDYQORǴAN. QazAqparat - Almaty oblysynda 10 jyl toqtap turǵan Aqsý qant zaýyty búgin qant qyzylshasynyń alǵashqy legin qabyldady. Sarqan aýdanynyń «Majıks» SDO alqabynan daıyndaý pýnktine 80 tonna tátti túbir jetkizildi, dep habarlaıdy QazAqparat tilshisi.

Osy qýanyshty oqıǵamen zaýyt ujymy men sharýalardy oblys ákiminiń orynbasary Serikjan Beskempirov quttyqtady. Óz sózinde S. Beskempirov zaýyttyń qant qyzylshasyn alǵash qabyldaý qyzylshashylar úshin de, óńdeýshiler úshin de, jergilikti halyq úshin de erekshe oqıǵa ekenin atap ótti. On jyl boıy turalap qalǵan Aqsý qant zaýytynyń qalaquraýshy kásiporyn mártebesin qaıta jańǵyrtatyn kúni de alys emes. Al zaýyttyń iske qosylýy jańa jumys oryndarynyń ashylýyna jáne sapaly qant óndirý isin ilgeriletýge yqpal etpek.
 

 

Eske salsaq, qazirgi kezde Aqsý qant zaýytyn qalpyna keltirý jumystarynyń negizgi bóligi aıaqtaldy. Qyzylsha jınaqtaý alańy ǵana emes, barlyq tsehtary jumysqa daıyn, jańa qural-jabdyqtar ornatylǵan, tehnologııalyq protsester túgel avtomattandyrylady. Ázirge munda 100 adam jumysqa tartylǵan, degenmen zaýyt tolyq iske qosylǵanda mundaǵy mamandar sany 650-ge jetkizilmek. Óndiristik qýatyna saı maýsymyna 300 myń tonna shıkizat óńdeı alady. Al daıyn ónimniń kólemi 32-35 myń tonna bolady dep josparlanyp otyr. Aqsý qant zaýytyn shıkizatpen negizinen Aqsý, Sarqan, Alakól aýdandarynyń qant ósirýshileri qamtamasyz etpek.