Almaty oblysynda 1 tonnaǵa jýyq balyq tıegen brakonerler ustaldy
TALDYQORǴAN. QazAqparat - Almaty oblysynyń Alakól aýdanynda 1 tonnaǵa jýyq balyq tıegen brakonerler ustaldy. Qazir osy derekter boıynsha tergeý júrip jatyr, dep habarlaıdy QazAqparat tilshisi.
Almaty oblystyq Polıtsııa departamentindegi baspasóz qyzmetiniń málimetinshe, Alakól aýdanynyń aýmaǵynda iri kólemde balyq tıegen eki avtokólik toqtatylǵan. Onyń biri aýdan ortalyǵy Úsharal qalasynyń mańynda qolǵa túsken. Tártip saqshylary arnaıy is-shara barysynda kóligine iri kólemde balyq tıegen jergilikti turǵyndy anyqtady. Ekinshi derek Alakól kóliniń mańynda tirkeldi. Kóligine jarty tonnadan astam «taban balyq» tıegen júrgizýshi polıtseılerge brakonerlik taýardy qaıda alyp bara jatqanyn túsindire almaǵan.
«Eki derek boıynsha tergeý amaldary júrgizilip jatyr. Júrgizýshilerdiń balyqty aýlaýǵa jáne ony tasymaldaýǵa tıisti qujattary joq. Birinshi kólikten 200 kılogramǵa jýyq balyq, al ekinshi kólikten 783 kılo balyq tárkilendi. Osy eki derek boıynsha memleketke keltirilgen materıaldyq shyǵyn eseptelip, ony óteý máselesi qarastyrylýda»,- dedi oblystyq Tabıǵat qorǵaý polıtsııasynyń ókili polıtsııa kapıtany Baǵlan Rymtaev.
Polıtsııa ókiliniń aqparatyna sáıkes, tárkilengen balyqtar tıisti qabyldaý oryndaryna ótkizilip, túsken qarajat memleket paıdasyna aýdarylady.
«Almaty oblysynda polıtseıler jyl basynan beri elimizdiń tabıǵat qorǵaý zańnamasyn buzýdyń 411 deregin áshkerelegen. Onyń ishinde 284 deregi boıynsha ákimshilik hattama toltyrylsa, 127 deregi boıynsha qylmystyq óndiris qozǵalǵan. Sekseýil aǵashyn shaýyp, tabıǵı baılyqqa qol salǵan 111 adam, zańsyz balyq aýlaǵan 8, ańshylyq jasaǵan 6 tulǵa anyqtaldy»,- dep atap ótti oblystyq polıtsııanyń baspasóz qyzmeti.
