Almaty oblysynda 1 aılyq sábı koronavırýstan emdelip shyqty
TALDYQORǴAN. QazAqparat - Almaty oblysynda Eńbekshiqazaq aýdanynyń dárigerleri 1 aılyq sábıdi de, 73 jastaǵy qarııany da koronavırýstan emdep shyǵardy, dep habarlaıdy QazAqparat tilshisi.
«Búgin Almaty oblysynda koronavırýs ınfektsııasyn juqtyrǵan 14 adam aýrýhanadan shyǵaryldy. Emdelip shyqqan 14 adamnyń 9-y bir otbasynyń músheleri. Otbasynda vırýs juqtyrǵandardyń qatarynda 2017 j, 2014 j. 2012 j týǵan balalarmen qatar 2020 jyldyń 26 naýryz kúni dúnıege kelgen 1 aılyq sábı de bar», - delingen Almaty oblysy ákiminiń baspasóz qyzmetitaratqan habarlamada.
Eńbekshiqazaq aýdanaralyq kópsalaly aýrýhananyń dırektory Jámıla Abeýova koronavırýs dıagnozymen túsken eń kishkentaı patsıentti dárigerler erekshe baqylaýǵa alǵanyn aıtty.
«Bala aýrýhanaǵa túsken kezde týǵanyna 18 kún ǵana bolǵan. Sondyqtan erekshe baqylaýǵa alyp, kúndelikti emdeý tásilin dárigerlermen talqylap otyrdyq. Balada em qabyldaý kezinde eshqandaı qıyndyq týǵan joq. Bala anasynyń janynda boldy. Aýrýhanadaǵy 20 kún ishinde 1 keli salmaq qosty. Qazir jaǵdaıy jaqsy», - deıdi bas dáriger.
Sonymen qatar Eńbekshiqazaq aýdanynda 16 sáýir kúni tirkelgen 2 adamnyń biri 73 jastaǵy qarııa bolsa, 28 jastaǵy Esik qalasynyń turǵyny. Dárigerler qarııa koronavırýs ınfektsııasynan tolyq emdelip shyqqanyn aıtady.
Al Qaskeleń qalalyq ınfektsııalyq aýrýhanasynda 17 sáýirden bastap em qabyldaǵan Qarasaı aýdanynyń 49, 53, 35 jastaǵy turǵyndar búgin tolyqtaı jazylyp shyqty.
Atalǵan eki aýdannyń emdelýshilerine 1 mamyr kúni júrgizilgen qaıta taldaý teris nátıje kórsetti.
Atap ótsek, Eńbekshiqazaq aýdanynda jazylyp shyqqandardyń barlyǵy Rahat aýyldyq okrýgine qarasty «Kóksaı», «Bereke», «Altyn Alma», «Altyn adam» saıajaılarynyń turǵyndary. Atalǵan saıajaılarda aýrýdyń jańa jaǵdaıy tirkelmegendikten, olardaǵy karantın alynyp tastaldy.
COVID-19 ınfektsııasynyń taralýy boıynsha epıdemologııalyq jaǵdaıdyń ózgerýine baılanysty karantın sharalarynyń rejımi men merzimi ózgerýi múmkin. Biraq jalpy karantın talaptary saqtalady.
