Almaty oblysynda 1,5 mln teńgege zırat qorshaýlary urlandy

TALDYQORǴAN. QazAqparat - Almaty oblysynda zıratta temir qorshaýlardy urlaǵan kúdikti ustaldy, dep habarlaıdy QazAqparat tilshisi.

Almaty oblystyq Polıtsııa departamenti baspasóz qyzmetiniń málimetinshe, ury 1,5 mıllıon teńgeniń temirin qoldy qylǵan. Qazir kúdikti ustaldy. Kinásin tolyqtaı moıyndap otyr.

«21 men 24 maýsym kúnderi Qaratal aýdanynyń polıtsııa basqarmasyna Bastóbe aýylynyń úsh turǵynynan aryz tústi. Olar týystary jerlengen molanyń qorshaýlary joǵalǵanyna shaǵymdanǵan. Іs QR QK-niń 188-baby 1-bóligi boıynsha tirkelip, uryny izdeý jumystary júrgizildi. Kúdikti ustalyp, qamaýda otyr», - delingen atalǵan vedomstvonyń baspasóz qyzmeti taratqan habarlamada.

Anyqtalǵandaı, zırat qorshaýlaryn urlady degen kúdikke ilingen azamat dúkenderge nan jetkizýmen aınalysady.