Almaty oblysynda 1,5 aı buryn joǵalǵan jasóspirim tabyldy
TALDYQORǴAN. QazAqparat - Taldyqorǵan polıtseıleri bir jarym aı buryn joǵalyp ketken jasóspirimdi izdep tapty. 15 jastaǵy er bala óz otbasyna oraldy, dep habarlaıdy QazAqparat tilshisi.
Qazan aıynyń ortasyna taman Taldyqorǵannyń tártip saqshylaryna oqýshy balanyń joǵalǵany týraly aryz túsken. Jaǵdaıdy anyqtaı kele jasóspirimniń úıinen jıi ketetini belgili boldy. Bul joly ol óziniń dosymen ketip qalǵan. Onyń da ata-anasy polıtsııaǵa resmı aryzdanyp, kómek suraǵan.
«Eki jasóspirimdi izdeýge qalalyq polıtsııa basqarmasynyń jeke quramy jumyldyryldy. Polıtseıler qaladaǵy kompıýterlik klýbtardy, qaraýsyz qalǵan ǵımarattar men saıajaılardy sholyp shyǵyp, joǵalǵan balalar týraly aqparat pen málimetter áleýmettik jelilerge salyndy. Nátıjesinde jasóspirimderdiń Almaty qalasyna shyǵyp ketkeni anyqtaldy. Bir aı degende jasóspirimniń bireýi tabylyp, úıine qaıtaryldy», - dep málimdedi Almaty oblystyq Polıtsııa departamentiniń baspasóz qyzmeti.
Vedomstvonyń málimetinshe, ekinshi oqýshyny izdeý jumystary eki qalada da jalǵasty. Nátıjesinde jetisýlyq polıtseıler habar-osharsyz ketken balanyń qaıda júrgenin anyqtady. Ol Almaty qalasy mańyndaǵy eldimekenderdiń birinde qańǵyryp júrgen jerinen tabyldy. Qazirgi tańda jasópirim Taldyqorǵanǵa jetkizilip, týystaryna tapsyryldy. Balalardyń úıinen jıi qashatyny eskerilip, ıývenaldy polıtsııaǵa tirkeýge alyndy. Sondaı-aq, oblystyq polıtsııa departamentinde eki oqýshyǵa qatysty jınaqtalǵan materıaldar jasóspirimder isi boıynsh komıssııada qaralyp, olardyń ata-anasy bala tárbıesine salǵyrt qaraǵany úshin ákimshilik jaýapkershilikke tartylýy múmkin ekeni aıtyldy.
