Almaty oblysynan Senat depýtaty saılandy
TALDYQORǴAN. QazAqparat - Búgin І. Jansúgirov atyndaǵy Mádenıet saraıynda oblys máslıhattarynyń birlesken otyrysy ótti.
Jıyndy júrgizgen oblystyq máslıhattyń hatshysy Serik Muqanovtyń aıtýynsha, oblystaǵy túrli deńgeıdegi máslıhattarda jalpy sany 334 depýtat bolsa, búgingi jıynǵa 324 depýtat qatysty. Bul týraly Almaty oblysy ákiminiń baspasóz qyzmeti habarlady.
Basqosýdyń kún tártibinde Qazaqstan Respýblıkasy Parlamenti Senatynyń shyǵyp qalǵan depýtatynyń ornyna saılaý máselesi qaraldy.
Oblystyq saılaý komıssııasynyń tóraǵasy Tımýr Daýytov baıandama jasap, saılaýdy ótkizý táirtibi týraly túsindirip ótti.
Jalpy Senattyń shyǵyp qalǵan depýtatynyń ornyna eki kandıdat - Eskeldi aýdanynyń ákimi Nurlan Qylyshbaev jáne kásipker Ermek Mujyqov tirkelgen.
Oblystaǵy máslıhattar depýtattarynyń qoldaryna bıýlleten taratylyp, olar arnaıy qoıylǵan kabınalarda óz tańdaýlaryn jasady.
Saılaý barysynda 288 depýtat Nurlan Qylyshbaevqa, 35 depýtat E.Mujyqovqa daýys bergen. 1 bıýlleten jaramsyz dep tanyldy. Sóıtip, saılaý qorytyndysynda basym daýyspen Nurlan Qylyshbaev Senat depýtattyǵyna Almaty oblysynan saılandy.
Jıyn sońynda oblystyq máslıhat hatshysy Serik Muqanov, oblystyq ardagerler uıymynyń tóraǵasy Ermek Kelimseıit jańadan saılanǵan depýtatqa quttyqtaý tilekterin aıtsa, N. Qylyshbaev ózine bildirgen senimi úshin kópshilikke rızashylyǵyn jetkizdi
