Almaty oblysyna joldamamen 443 dáriger keledi

TALDYQORǴAN. QazAqparat – Bıyl Almaty oblysyna joldamamen 443 dáriger keletini josparlanyp otyr. Búginde óńirge 500-den astam medıtsına mamany qajet, dep habarlaıdy QazAqparat tilshisi.

2009-2018 jyldar aralyǵynda Jetisý óńirine 2162 dáriger kelgen. Olarǵa «Dıplommen aýylǵa» baǵdarlamasy arqyly túrli jeńildikter jasaldy. Baspanamen qamtylyp, páter alýǵa jeńildetilgen nesıe, sondaı-aq kótermeaqy berildi. Biraq oblys halqynyń sany ósýine baılanysty óńirge áli de birqatar maman jetispeıdi. Sondyqtan oblystyq Densaýlyq saqtaý basqarmasy «Jas maman» baǵdarlamasyn ázirlep, joǵary oqý oryndarynan keletin mamandardy qarsy alýǵa daıyndalýda. Basqarma basshysy Baýyrjan Ysqaqtyń aıtýynsha, óńirge 160-tan astam jalpy tájirıbedegi dáriger, 40 akýsher-gınekolog, 60-qa jýyq hırýrg jáne basqa da salalyq mamandar kelýi tıis.

«Medıtsınada qyzmet sapasyn joǵarylatý úshin dárigerlerge qaralatyn adamdardyń sany, ıaǵnı júktemesi tıisti bolýy tıis. Bir dárigerge 1700 adam qaralýy kerek. Búgingi kúnde bul san óte joǵary. Sondyqtan ol kórsetkishke jetý úshin biz dárigerler sanyn kóbeıtýimiz qajet», - dedi basqarma basshysy Baýyrjan Ysqaq.