Almaty oblysyna 51 medıtsınalyq jedel járdem kóligi berildi
TALDYQORǴAN.QazAqparat - Táýelsizdik kúni qarsańynda Almaty oblysyndaǵy medıtsına qyzmetkerlerine 51 jedel járdem kóligi berildi. Sý jańa tehnıkalardyń kiltterin oblys ákimi Amandyq Batalov tabystady, dep habarlaıdy QazAqparat tilshisi.
Bıyl óńirdiń emdeý-profılaktıkalyq mekemelerin avtokólikpen qamtamasyz etý maqsatynda jergilikti bıýdjetten 640 mln. teńge bólingen. Onyń 33 birligi - sanıtarlyq avtokólik, 18-i - jelilik, reanımatsııalyq jáne kardıo-reanımatsııalyq brıgadaǵa arnalǵan jyljymaly medıtsınalyq jedel járdem kesheni.
Bul keshen medıtsınalyq quraldarmen (elektrokardıograf, defıbrıllıator, jasandy demaltý portatıvti apparaty t.b.) qamtamasyz etilgen. Barlyq avtomashınalar oblystyń aýdan, qalalaryndaǵy medıtsına uıymdaryna bólinetin bolady.
Mamandardy Táýelsizdik kúnimen quttyqtaǵan óńir basshysy Amandyq Batalov oblystyń densaýlyq saqtaý salasyna bólinetin qarajat kólemi jyldan jylǵa artyp kele jatqanyn atap ótti. Nátıjesinde zaman talabyna saı densaýlyq saqtaý nysandary salynyp, olar eń sońǵy medıtsınalyq quraldarmen jabdyqtaldy.
Mamandar shetelde bilimderin jetildirýge múmkindik alyp, asa kúrdeli operatsııalardy oblystyń óz dárigerleri jasaı bastady. Tek sońǵy 3 jylda 50-den astam dáriger Ulybrıtanııa, Ońtústik Koreıa, Latvııa, Polsha, Izraıl, Túrkııa syndy alys shetelderde bilimin jetildirgen.
