Almaty oblysyna 1 trln teńgeden astam ınvestıtsııa tartyldy

TALDYQORǴAN. QazAqparat - Almaty oblysyna 1 trln teńgeden astam ınvestıtsııa tartyldy. Bul jóninde óńir basshysy Amandyq Batalov Qazaqstan Respýblıkasynyń Tuńǵysh Prezıdenti kúnine oraı Taldyqorǵanda ótken saltanatty jıynda málim etti, - dep habarlaıdy QazAqparat tilshisi.

Oblys ákimi bıylǵy jyly Almaty oblysy merekeni tolaıym tabystarmen qarsy alyp otyrǵanyn atap ótti. Máselen, 2014 jyly qant qyzylshasynyń alqaby nebári 1,2 myń gektar bolsa, bıylǵy jyly onyń kólemi 11,2 myń gektarǵa jetkizilip, 9,3 esege, al ónimdilik 13,8 esege ósken. Sonymen qatar oblysta qazirgi kezde árqaısynyń quny 1 mlrd teńgeden asatyn 50 iri joba júzege asyrylýda. Sonyń 30-y - sheteldik ınvestorlardyń, onyń ishinde 9-y - transulttyq kompanııalardyń qatysýymen iske asyrylýda. Jalpy sheteldik ınvestorlardyń qoldaýymen qolǵa alynǵan 30 jobanyń arqasynda 1 trln teńgeden astam ınvestıtsııa tartyldy.  

"Memleket basshysynyń qoldaýymen qol jetkizilgen osy nátıjelerdiń barlyǵy - birlesken jumystyń nátıjesi. Búgingi merekeni paıdalanyp, barsha jetisýlyqtarǵa rızashylyǵymdy bildiremin. Alda áli talaı josparlar bar. Elbasynyń Joldaýlarynda jáne baǵdarlamalyq maqalalarynda aıtylǵan strategııalyq mańyzdy mindetterin júzege asyrý jolynda yntymaqpen eńbek etemiz dep senemin", - dedi A. Batalov.

 Saltanatty kesh barysynda Qarasaı aýdandyq aqsaqaldar alqasynyń tóraǵasy, Elbasynyń synyptasy Saılaýbek Qydyralıev sóz aldy. Ardager óz sózinde Memleket basshysynyń bala kúninen baıqalǵan erekshe darynyna toqtalyp, estelikter aıtyp berdi. Óziniń balalyq shaǵy men búgingi beıbit te berekeli zamandy salystyra áńgimelep, elge bereke-birlik, Elbasyna myqty densaýlyq tilep, kópshilikti Tuńǵysh Prezıdent kúnimen quttyqtady.

«Ólke tynysy» JShS bas dırektory Meıram Janádilov te quttyqtaý tilegin aıtyp, respýblıkalyq telearnalarda jumys istegen shaqtarynda Elbasymen birge júrgen saparlarynan estelikter aıtty. Sol sııaqty І. Jansúgirov atyndaǵy Jetisý memlekettik ýnıversıtetiniń rektory Qýat Baımyrzaev, Aqsý aýdanyndaǵy aqyn Sara atyndaǵy jastar mádenı ortalyǵynyń dırektory Farıza Anvartýreqyzy da quttyqtaý tilekterin jetkizdi.

Shara memlekettik qyzmetke jańadan jumysqa turǵan 7 jas mamannyń saltanatty túrde ant qabyldaý rásimimen jalǵasty. Osy jıynda A. Batalov «Astananyń 20 jyldyǵy» mereıtoılyq medalimen oblystyń birqatar azamattaryn marapattady.