Almaty oblysy: Jyldyń úzdik sportshylary kimder
TALDYQORǴAN. QazAqparat - Búgin Taldyqorǵan qalasynda Almaty oblysynyń úzdik sportshylaryna qurmet kórsetildi. Saltanatty kezdesýde oblys ákimi Amandyq Batalov olarǵa marapattar tapsyryp, jańa jeńister men bıik belester tiledi, dep habarlaıdy «QazAqparat» HAA tilshisi.
Ótken jyl qorytyndysy boıynsha ziltemirshi Albert Lınder men Karına Gorıcheva jáne grek-rım kúresiniń sheberi Demeý Jadyraev úzdik sportshylar atandy. Sporttaǵy eren eńbekteri úshin olarǵa dıplomdar men árqaısysyna 700 myń teńgeniń sertıfıkaty berildi. Budan ózge, jyl ishindegi jetistikteri úshin 28 sportshyǵa 150 myńnan 400 myń teńgege deıingi sertıfıkattar tapsyryldy. Qurmetke bólengender qatarynda Olga Pastýhova, Anatolıı Savelev, Jandos Ismaılov, Begarys Sadýaqasov, Alena Stanskaıa, Ulan Rysqul, Beıbit Nazarov jáne basqalary da bar.
Jattyqtyrýshylar quramy da nazardan tys qalǵan joq. Jyldyń úzdik jattyqtyrýshylary bolyp Sergeı Sedov pen Boranbek Qońyratov tanyldy. Sonymen qatar shákirtteri jeńis tuǵyrynan kóringen 20-dan astam bapker de qurmetke bólendi. Olar - Alekseı Klınovıtskıı, Ábilqaıyr Baıbosynov, Manat Talaspaev, Azamat Balpyqov jáne taǵy basqalar.
Kezdesý barysynda oblystaǵy úzdik sporttyq mekemelerge de marapattar berildi.
Aıta ketý kerek, 2017 jyly Almaty oblysynyń sportshylary túrli deńgeıdegi 1345 medal jeńip aldy (495 altyn, 372 kúmis, 478 qola). Ótken jyly 1 QR Eńbek sińirgen sport sheberi, 18 halyqaralyq sanattaǵy sport sheberi, 132 sport sheberi, 648 sport sheberligine kandıdattar men 381 birinshi razrıadtaǵy sportshylar daıyndaldy. Sondaı aq oblysta sportty damytýǵa erekshe qoldaý kórsetilýde. Máselen ótken jyly dene shynyqtyrý jáne sport salasyna jergilikti bıýdjetten 8 mlrd teńge qarastyrylsa, bıylǵy jyly bul soma 14 mlrd teńgege jetip otyr.
